मी बोलले न काही नुसतेच पाहिले
हृदयात दाटलेले हृदयात राहिले
परतून हाय जाण्या ओठांत शब्द आले
डोळ्यांतले इशारे डोळ्यांत कैद झाले
मी बंद पापण्यांनी हे सर्व साहिले
देऊन सर्व काही नाही दिलेच काही
ज्याला हवे कळाया कळलेहि त्यास नाही
माझ्याच अंतरी मी हे फूल वाहिले
निःशब्द आसवांनी समजाविले मनाला
की शाप वेदनेचा प्रीतीस लाभलेला
माझ्याच मी मनाशी हे गीत गायिले
गीत – मंगेश पाडगांवकर
संगीत – विश्वनाथ मोरे
स्वर- सुमन कल्याणपूर
गीत प्रकार – भावगीत
खिन्‍न या वाटा दूर पळणार्‍या
या स्मृती सार्‍या जीव छळणार्‍या
लाडक्या शपथा, लाजरी वचने
पाकळ्या त्यांच्या आज गळणार्‍या
रात वैरिण ही सात जन्मांची
आणि या उल्का तोल ढळणार्‍या
चांदण्याकाठी धुंद त्या भेटी
या व्यथा उरल्या आज जळणार्‍या
गीत – मंगेश पाडगांवकर
संगीत – श्रीनिवास खळे
स्वर- उषा मंगेशकर
गीत प्रकार – भावगीत
रडतच आलो येताना पण हासत जावे जाताना
अंगावर आसूड विजेचे
झेलून घेती घन वर्षेचे
सार्थक झाले कोसळण्याचे तृषित धरित्री न्हाताना
हासत हासत ज्योती जळली
कोळोखाची रात्र उजळली
पहाट झाली तेव्हा नव्हती तेजोमय जग होताना
बीज आतुनी फुटुन गेले
वेदनेत या फूल जन्मले
अमरपणाचा अर्थ आकळे मरण झेलुनी घेताना
कुणी दु:खाचा घोट घेतला
खोल व्यथेने प्राण पेटला
त्या दु:खाचे झाले गाणे जीव उधळुनी गाताना
गीत – मंगेश पाडगांवकर
संगीत – यशवंत देव
स्वर- अरुण दाते
गीत प्रकार – भावगीत
सखी मी दर्ददिवाणी, माझी व्यथा कुणा न कळे ग !
घायाळाची मर्मवेदना घायाळास कळे ग !
रत्‍नपारख्याविण रत्‍नांची कुणा न पारख व्हावी
शूलावर मम शेज सखे जर नीज कशी मज यावी
गगनमंडळी शेज प्रियाची, मीलन मग कोठे ग !
फिरते वणवण जखमी होवून, वैद्य कुणी न भेटे ग
मीरेची संपेल व्यथा जर हरीच वैद्य मिळे ग !
गीत – मंगेश पाडगांवकर
संगीत – यशवंत देव
स्वर- शोभा जोशी
गीत प्रकार – हे श्यामसुंदर, भावगीत
शब्द शब्द जपुन ठेव बकुळिच्या फुलापरी
काय बोलले नकळे
तू समजुन घे सगळे
लाविलीस ज्योत तूच या उदास अंतरी
दुःख नको तुटताना
अश्रु नको वळताना
मी मिटता लोचन हे उमलशील तू उरी
साक्ष लाख तार्‍यांची
स्तब्ध अचल वार्‍याची
ज्योत बनुन जळले रे मी तुझ्या पथावरी
गीत – मंगेश पाडगांवकर
संगीत – विश्वनाथ मोरे
स्वर- सुमन कल्याणपूर
राग – पूरिया धनाश्री, पूरिया, मारवा
गीत प्रकार – भावगीत
श्रावणात घन निळा बरसला रिमझिम रेशिमधारा
उलगडला झाडांतुन अवचित हिरवा मोरपिसारा
जागून ज्याची वाट पाहिली ते सुख आले दारी
जिथे तिथे राधेला भेटे आता श्याम मुरारी
माझ्याही ओठांवर आले नाव तुझेच उदारा
रंगांच्या रानात हरवले हे स्वप्‍नांचे पक्षी
निळ्या रेशमी पाण्यावरती थेंबबावरी नक्षी
गतजन्मीची ओळख सांगत आला गंधित वारा
पाचूच्या हिरव्या माहेरी ऊन हळदिचे आले
माझ्या भाळावर थेंबाचे फुलपाखरू झाले
मातीच्या गंधाने भरला गगनाचा गाभारा
पानोपानी शुभशकुनाच्या कोमल ओल्या रेषा
अशा प्रीतिचा नाद अनाहत, शब्दावाचुन भाषा
अंतर्यामी सूर गवसला, नाही आज किनारा
गीत – मंगेश पाडगांवकर
संगीत – श्रीनिवास खळे
स्वर- लता मंगेशकर
गीत प्रकार – ऋतू बरवा, भावगीत
टप टप टप थेंब वाजती, गाणे गातो वारा
विसरा आता पाटी-पुस्तक मजेत झेला धारा
पाऊस आला रे पाऊस आला
घराघरावर, कौलारावर, आले झिमझिम पाणी
गुणगुणती झाडांची पाने हिरवीहिरवी गाणी
अवतीभवती भिजून माती सुगंध भरला सारा
काळ्याभोर ढगांना झाली कोसळण्याची घाई
इवले इवले पंख फुलवुनी गाते ही चिऊताई
आनंदे हंबरती गाई समोर विसरून चारा
गीत – मंगेश पाडगांवकर
संगीत – श्रीनिवास खळे
स्वर- शमा खळे
गीत प्रकार – बालगीत, ऋतू बरवा
टप्‌ टप्‌ पडती अंगावरती प्राजक्ताची फुले
भिर्‌ भिर्‌ भिर्‌ भिर्‌ त्या तालावर गाणे अमुचे जुळे !
कुरणावरती, झाडांखाली
ऊन-सावली विणते जाळी
येतो वारा पाहा भरारा, गवत खुशीने डुले !
दूर दूर हे सूर वाहती
उन्हात पिवळ्या पहा नाहती
हसते धरती, फांदीवरती हा झोपाळा झुले !
गाणे अमुचे झुळझुळ वारा
गाणे अमुचे लुकलुक तारा
पाऊस वारा मोरपिसारा, या गाण्यातुन फुले !
फुलांसारखे सर्व फुला रे
सुरांत मिसळुनि सूर चला रे
गाणे गाती तेच शहाणे, बाकी सारे खुळे !
गीत – मंगेश पाडगांवकर
संगीत – वसंत देसाई
स्वर- वाणी जयराम, आकाशवाणी गायकवृंद
गीत प्रकार – बालगीत
थांब रे घना,
जा निरोप घेउनी, सांग मोहना
कुंज कुंज हा उदास
जागेपणी होत भास
तूच एक जाणिसी माझिया मना
एकटीच झुरत उभी
तारका न एक नभी
एकटीच सोशिते सर्व यातना
सांग जाउनी तयास
वैरी माझेच श्वास
फूलही मला इथे होय वेदना
गीत – मंगेश पाडगांवकर
संगीत – विश्वनाथ मोरे
स्वराविष्कार- ∙ उषा मंगेशकर∙ साधना सरगम( गायकांची नावे कुठल्याही विशिष्ट क्रमाने दिलेली नाहीत. )
गीत प्रकार – हे श्यामसुंदर, भावगीत
टीप – • स्वर- उषा मंगेशकर, संगीत- विश्वनाथ मोरे.• स्वर- साधना सरगम, संगीत- मंदार आपटे.
या जन्मावर या जगण्यावर शतदा प्रेम करावे
चंचल वारा या जलधारा भिजली काळी माती
हिरवे हिरवे प्राण तशी ही रुजून आली पाती
फुले लाजरी बघुन कुणाचे हळवे ओठ स्मरावे
रंगांचा उघडुनिया पंखा सांज कुणी ही केली?
काळोखाच्या दारावरती नक्षत्रांच्या वेली
सहा ऋतूंचे सहा सोहळे येथे भान हरावे
बाळाच्या चिमण्या ओठांतुन हाक बोबडी येते
वेलीवरती प्रेम प्रियेचे जन्म फुलांनी घेते
नदीच्या काठी सजणासाठी गाणे गात झुरावे
या ओठांनी चुंबुन घेईन हजारदा ही माती
अनंत मरणे झेलुन घ्यावी इथल्या जगण्यासाठी
इथल्या पिंपळपानावरती अवघे विश्व तरावे
गीत – मंगेश पाडगांवकर
संगीत – यशवंत देव
स्वर- अरुण दाते
राग – खमाज
गीत प्रकार – भावगीत
यशाला घालती माला यशाचे सर्व देव्हारे
यशाची लागता किल्ली खुली होतात ही दारे
यशाच्या जाहिरातीला दलालांच्या खुल्या पेठा
नटीचे लाडके कुत्रे बने संताहुनी प्यारे
यशाचा खोकला सुद्धा विके गाण्यापरी येथे
यशाला हे गुणी सुद्धा असे लाचार सामोरे
यशाच्या आसनावरती जरासे बूड टेकावे
किती गर्दी, किती टाळ्या, किती हे स्तोत्र गाणारे
यशाची लागता किल्ली खुली होतात ही दारे
गीत – मंगेश पाडगांवकर
संगीत – सी. रामचंद्र
स्वर- सी. रामचंद्र
गीत प्रकार – भावगीत
अखेरचे येतिल माझ्या हेच शब्द ओठी
लाख चुका असतिल केल्या, केली पण प्रीती
इथे सुरू होण्याआधी संपते कहाणी
साक्षीला केवळ उरते डोळ्यांतिल पाणी
जखम उरी होते ज्यांच्या तेच गीत गाती
सर्व बंध तोडुनि जेव्हा नदी धुंद धावे
मीलन वा मरण पुढे हे तिला नसे ठावे
एकदाच आभाळाला अशी भिडे माती
गंध दूर ज्याचा आणिक जवळ मात्र काटे
असे फूल प्रीती म्हणजे कधी हाय वाटे
तरी गंध धुंडित धावे जीव तुझ्यासाठी
आर्त गीत आले जर हे कधी तुझ्या कानी
गुज अंतरीचे कथिले तुला या स्वरांनी
डोळ्यांतून माझ्यासाठी लाव दोन ज्योती
गीत – मंगेश पाडगांवकर
संगीत – यशवंत देव
स्वर- अरुण दाते
गीत प्रकार – भावगीत
भातुकलीच्या खेळामधली राजा आणिक राणी
अर्ध्यावरती डाव मोडला, अधुरी एक कहाणी
राजा वदला, “मला समजली शब्दांवाचुन भाषा
माझ्या नशिबासवे बोलती तुझ्या हातच्या रेषा”
का राणीच्या डोळां तेव्हा दाटुनि आले पाणी?
राणी वदली बघत एकटक दूरदूरचा तारा
“उद्या पहाटे दुसर्‍या वाटा, दुज्या गावचा वारा”
पण राजाला उशिरा कळली गूढ अटळ ही वाणी
तिला विचारी राजा, “का हे जीव असे जोडावे?
का दैवाने फुलण्याआधी फूल असे तोडावे?”
या प्रश्‍नाला उत्तर नव्हते, राणी केविलवाणी
का राणीने मिटले डोळे दूर दूर जाताना?
का राजाचा श्वास कोंडला गीत तिचे गाताना?
वार्‍यावरती विरून गेली एक उदास विराणी
गीत – मंगेश पाडगांवकर
संगीत – यशवंत देव
स्वराविष्कार- ∙ अरुण दाते∙ देवकी पंडित( गायकांची नावे कुठल्याही विशिष्ट क्रमाने दिलेली नाहीत. )
राग – वृंदावनी सारंग
गीत प्रकार – भावगीत
टीप – • स्वर- अरुण दाते, संगीत- यशवंत देव.• स्वर- देवकी पंडित, संगीत- अशोक पत्‍की(शीर्षक गीत, मालिका- अधुरी एक कहाणी, वाहिनी- झी मराठी.)
डोळे कशासाठी? कशासाठी?
तुला साठवून मिटून घेण्यासाठी
आला भरून पाऊस, नको एकटा जाऊस
अरे सरी कशासाठी, तुला बिलगून भिजून जाण्यासाठी
नाव तुझे मनातले, चांदणेच रानातले
शब्द कशासाठी, तुला आठवून भरून येण्यासाठी
वेल मोहरून आली, फुले अंगभर झाली
वारा कशासाठी, गंधवनातून पाखरू होण्यासाठी
असा तुझा भरवसा, चांदण्याचा कवडसा
ओठ कशासाठी, थोडे थरारून जुळून जाण्यासाठी
गीत – मंगेश पाडगांवकर
संगीत – यशवंत देव
स्वर- अनुराधा पौडवाल, अरुण दाते
गीत प्रकार – भावगीत, युगुलगीत, नयनांच्या कोंदणी
धरिला वृथा छंद
नव्हतेच जर फूल, कोठून मकरंद?
जरि जीव हो श्रांत
नाही तृषा शांत
जलशून्य आभास शोधीत मृग अंध
झाले तुझे भास
मी रोधिले श्वास
माझीच मज आस घाली असा बंध
पथ सर्व वैराण
पायी नुरे त्राण
माझेच घर आज झाले मला बंद
गीत – मंगेश पाडगांवकर
संगीत – श्रीनिवास खळे
स्वर- सुरेश वाडकर
गीत प्रकार – भावगीत
एक होता काऊ, तो चिमणीला म्हणाला,
“मला घाल न्हाऊ, घाल न्हाऊ, घाल न्हाऊ”
एक होता पोपट, तो चिमणीला म्हणाला,
“तू मला थोपट, तू मला थोपट, तू मला थोपट”
एक होती घूस, ती चिमणीला म्हणाली,
“तू माझे अंग पूस, तू माझे अंग पूस, तू माझे अंग पूस”
एक होती गाय, तिने चिमणीला विचारले,
“तुझे नाव काय, तुझे नाव काय, तुझे नाव काय?”
एक होते कासव, ते चिमणीला म्हणाले,
“मला चड्डी नेसव, मला चड्डी नेसव, मला चड्डी नेसव”
गीत – मंगेश पाडगांवकर
संगीत – श्रीनिवास खळे
स्वर- शमा खळे
गीत प्रकार – बालगीत
डोळ्यांवरून माझ्या उतरून रात्र गेली
वचने मला दिलेली विसरून रात्र गेली !
डोळ्यांत जन्म सारा दाटून डोह झाला
अश्रूंत चंद्र माझ्या विखरून रात्र गेली !
मी मानिले मनाशी, माझेच सर्व तारे
स्वप्‍नात हाय माझ्या बहरून रात्र गेली !
गीत – मंगेश पाडगांवकर
संगीत – अनिल-अरुण
स्वर- अनुराधा पौडवाल
गीत प्रकार – शब्दशारदेचे चांदणे, भावगीत, नयनांच्या कोंदणी
डोळ्यांत सांजवेळी आणू नकोस पाणी
त्या दूरच्या दिव्यांना सांगू नको कहाणी
कामात गुंतलेले असतील हात दोन्ही
तेव्हा नको म्हणू तू माझी उदास गाणी
वाटेवरी खुणेच्या शोधू नको फुले ती
ना ठेविते फुलांची माती इथे निशाणी
कळणार हाय नाही दुनिया तुला मला ही
मी पापण्यांत माझ्या ही झाकिली विराणी
गीत – मंगेश पाडगांवकर
संगीत – यशवंत देव
स्वर- अरुण दाते
राग – पूर्वा कल्याण
गीत प्रकार – भावगीत, नयनांच्या कोंदणी
कधी बहर कधी शिशिर, परंतु दोन्ही एक बहाणे
डोळ्यांमधले आसू पुसती ओठांवरले गाणे
बहर धुंद वेलीवर यावा
हळूच लाजरा पक्षी गावा
आणि अचानक गळुन पडावी विखरुन सगळी पाने
भान विसरुनी मिठी जुळावी
पहाट कधि झाली न कळावी
भिन्‍न दिशांना झुरत फिरावे नंतर दोन दिवाणे
हळूच फुलाच्या बिलगुन गाली
नाजुक गाणी कुणी गायिली
आता उरली आर्त विराणी सूरच केविलवाणे
जुळली हृदये, सूरहि जुळले
तुझे नि माझे गीत तरळले
व्याकुळ डोळे कातरवेळ स्मरून आता जाणे
गीत – मंगेश पाडगांवकर
संगीत – यशवंत देव
स्वर- सुधीर फडके
राग – मिश्र किरवाणी
गीत प्रकार – भावगीत, नयनांच्या कोंदणी
एकट्याने एकटे गर्दीत चालावे
एकट्याने आपल्याशी फक्त बोलावे
थांबते गर्दी फुलांच्या उंबर्‍यापाशी
एकट्याने आतुनी निर्माल्य हुंगावे
दार हे अपुले तिर्‍हाईत होत असे जेव्हा
एकट्याने ओळखावे अन्‌ पुढे जावे
एकट्याला हाक येते रानपक्ष्याची
एकट्याने पाखरू प्राणांत झेलावे
लागते जावेच या अंधारयात्रेला
एकट्याने एकटा अपुला दिवा व्हावे
गीत – मंगेश पाडगांवकर
संगीत – श्रीधर फडके
स्वर- अवधूत गुप्‍ते
अल्बम – संगीत मनमोही रे
गीत प्रकार – भावगीत