मज सांग सखे तू सांग मला
पत्रात लिहू मी काय तुला?
चंद्रमुखी तू चांद म्हणू तर
प्रिये म्हणू का तुज घटकाभर
रूप तुझे गिरवीत निरंतर शब्द सुचेना काहि मला
किंचित हसर्या तव नजरेवर
लाज बावरी, रूप मनोहर
नजरानजरी मीही क्षणभर अर्थ मनीचा जाणियला
लिहिता लिहिता शब्द थांबती
लिहू नये तर कसली प्रीती
नाव सारखे ओठांवरती वेड लाविते जिवाला
गीत – रमेश अणावकर
संगीत – अनिल मोहिले
स्वर- अरुण दाते
गीत प्रकार – भावगीत
नकळत सारे घडले
मी वळता पाऊल अडले
ती पहिली क्षण ओझरती
परिचयात ओळख नुसती
संभाषण ओठांवरती, लाजण्यात राहुन गेले
नजरेला नजरेमधला
हसताना भाव उमगला
प्रीतीचा डावही पहिला मी क्षणांत मोहुन हरले
सोन्याहुन अति मोलाचे
हे माझे गुपित मनीचे
मनी सुगंध उधळित नाचे, क्षण मलाच का हे नकळे
गीत – रमेश अणावकर
संगीत – दशरथ पुजारी
स्वर- सुमन कल्याणपूर
गीत प्रकार – भावगीत
पत्र तुझे ते येता अवचित
लाली गाली खुलते नकळत
साधे सोपे पत्र सुनेरी
नकळे क्षणभर ठेवु कुठे मी
शब्दोशब्दी प्रीत हासरी
लाज मनाला, मी शरणागत
आजवरी जे बोलु न शकले
शब्दांवाचुन तू ओळखिले
गीत लाजरे ओठांवरले
गुणगुणते मी नयनी गिरवित
वेळीअवेळी झोपेमधुनी
जागी होते मी बावरुनी
खुळ्या मनीचा भास जाणुनी
गुज मनीचे हृदयी लपवित
गीत – रमेश अणावकर
संगीत – बाळ चावरे
स्वर- कृष्णा कल्ले
गीत प्रकार – भावगीत
तार छेडिता बोल उमंगे
विठ्ठल रखुमाई पांडुरंगे
तुझ्यासारखा तूच खरोखर
जगताचा जगदीश मनोहर
माय माउली रखुमाई तर
वामांगी तव सदैव संगे
भक्तीसाठी आतुरलेला
भक्तांचा तू देव आगळा
तुझ्या लोचनी जगावेगळा
भाव रंगतो अनंतरंगे
शब्दोशब्दी अमृत ओतुनी
संतांची ती रसाळ वाणी
भावभक्तीने तुझिया चरणी
गाथा पोथी अभंग सांगे
गीत – रमेश अणावकर
संगीत – वसंत प्रभु
स्वर- स्नेहल जोशी
गीत प्रकार – विठ्ठल विठ्ठल