हरिनाम मुखी रंगते
एकतारी करी वाजते
विनविते मी तुला भाववेडी मीरा
गोड नामी तुझ्या दंगते
घरट्यात माझिया आनंदाचा ठेवा
तूच यदुनाथा सदा असू द्यावा
इतुकेच मागणे तुझ्यापाशी मी मागते
काम-क्रोध-मत्सर कधी ना पाहिले
लोभ-मोह सारे दूर मी सारिले
हरीच्याच चिंतनी जीवनास मी वाहते
गीत – शांताराम नांदगांवकर
संगीत – अनिल-अरुण
स्वर- आशा भोसले
गीत प्रकार – हे श्यामसुंदर, भावगीत
लहान सुद्धा महान असते, ठाऊक आहे तुम्हाला
इवलेइवले जीवही येती मोठ्या मोठ्या कामाला !
महा भयंकर सिंह एकदा गुहेमध्ये निजलेला
एक छोटासा उंदीर आला
सिंहाच्या अंगावर चढुनी ओढी दाढी-मिशाला !
सिंह जागला करीत गर्जना, धरिला उंदीर त्याने
म्हणे चिमुरड्या, “तुला फाडतो माझ्या या पंजाने.”
थरथर कापे, उंदीर सांगे, “येईन कधीतरी कामाला !”
इवलेइवले जीवही येती मोठ्या मोठ्या कामाला !
(या थरथर कापणार्या उंदराचा सिंहाने उपहास केला.
तो म्हणाला, “अरे मूर्खा तू माझ्या एका घासाचाही नाहीस !
चिमुरडा तू, वनराजाच्या कसल्या कामी येणार आहेस रे?
चल, चालता हो इथून.”
सुटका होताच उंदीर बिळात पळून गेला. पण एकदा काय झालं ठाऊक आहे?)
कधी एकदा सिंह अडकला फसूनिया जाळ्यात
वनराजा हो केविलवाणा ये पाणी डोळ्यांत !
हादरे जंगल, अशी गर्जना ऐकून उंदीर धावे
सिंहाला तो सांगे, “आता माझे शौर्य बघावे !
भिऊ नका हो, रडू नका हो, सोडवितो तुम्हाला.
नका लोचनी आणू पाणी, पाळीन मी वचनाला.”
सर्व शक्तीने कुरतडुनीया उंदीर तोडी जाळे
पाहून सारे मग सिंहाचे भरुनी आले डोळे !
जीव चिमुकला संकटकाळी अखेर कामी आला
इवलेइवले जीव कितिदा येती मोठ्या कामाला !
गीत – शांताराम नांदगांवकर
संगीत – सी. रामचंद्र
स्वर- सी. रामचंद्र
गीत प्रकार – बालगीत
नकोस नयनी भरू आसवे देऊ नको हुंदके
लक्ष्मी तू या नव्या घराची झालीस ग लाडके
तुझ्या पाउली येईल आता
आनंदाची अमोल सरिता
घरकुल आमुचे प्रसन्नतेने होईल ग बोलके
इथे अंगणी किती नाचतील
तुझ्या स्मितासम सुमने चंचल
तुझ्याच वात्सल्यातुन येतिल या सदनी माणिके
नको बावरू मुली अशी तू
मनी न ठेवी कसला किंतू
तुझ्या गुणांची गंगा आम्हा पाहू दे कौतुके
गीत – शांताराम नांदगांवकर
संगीत – प्रभाकर जोग
स्वर- माणिक वर्मा
गीत प्रकार – भावगीत, नयनांच्या कोंदणी
श्रीरंग सावळा तू, मी गौरकाय राधा
ही प्रीत दो जिवांची अद्वैत रे मुकुंदा
ये राधिके अशी ये होऊन प्रीति मुग्धा
नयनांतुनी फुलू दे अपुल्या अमोल छंदा
ये प्रेमले अशी ये, फुलवित सुप्रभाती
प्रणायातल्या सुरांनी सजवीत सांजराती
मिटल्या फुलापरी त्या तव नील लोचनांत
लावून भारलेली भावूक प्रीती-ज्योत
का लोचनी प्रिया रे हृदयी तुझेच रूप
दिनरात लाविते मी येथे तुझाच दीप
गाते तुझेच गाणे, कथनी तुझे उखाणे
तुझियाकडेच धावे मनपाखरू दिवाणे
येताच मी परंतु तुझिया समीप का गे
होसी अबोल वेडी विणशी मनात धागे
त्या चित्त पाखराला लपवून ठेविसी का
भारावुनी अशी या नेत्रांत पाहसी का
ते बोलके अबोल क्षण सर्व आठवावे
मम लाजर्या दिठीत सारेच साठवावे
हा छंद या जिवाला जडवी तुझीच मूर्ती
मी मंगलातुनी या गुंफी अभंग नाती
गीत – शांताराम नांदगांवकर
संगीत – अनिल मोहिले
स्वर- अरुण दाते, कृष्णा कल्ले
राग – दरबारी
गीत प्रकार – हे श्यामसुंदर, भावगीत, युगुलगीत
संहारुनि अरि, रघुकुलदीपक
आले हो श्रीराम
म्हणा, श्रीराम जय राम जय जय राम
सजवा वेशी, सजवा द्वारे
पृथ्वीवर गगनाचे तारे
रघुविजयाचे गंधित वारे
नभधरणीचा कणकण घोषी
प्रभुरामाचे नाम
रघुपति आले, सीता आली
आज अयोध्या पावन झाली
गुलाल उधळा लक्ष्मणभाळी
बंधुत्वाची अमोल मूर्ती
सोबत जन विश्राम
गीत – शांताराम नांदगांवकर
संगीत – अशोक पत्की
स्वर- पं. जितेंद्र अभिषेकी
नाटक – कैकेयी
गीत प्रकार – नाट्यसंगीत, राम निरंजन
तळव्यावर मेंदीचा अजून रंग ओला
माझ्या मनी प्रीत तुझी घेते हिंदोला
गायिलेस डोळ्यांनी एक निळे गाणे
बट हळवी वार्यातील वेचिते तराणे
नकळत तव हात प्रिये हाती मम आला
पवनातुनी शीतलता दाटुनिया आली
दोन मने प्रीतीच्या गंगेतच न्हाली
आसमंत आनंदे धुंद धुंद झाला
ही दुपार भिजलेली प्रीत चांदण्यात
मिटुनी पंख खग निवांत शांत तरूलतांत
आज तुझ्या सहवासी जीव धन्य झाला
गीत – शांताराम नांदगांवकर
संगीत – अरुण पौडवाल
स्वर- अनुराधा पौडवाल, सुरेश वाडकर
गीत प्रकार – भावगीत, युगुलगीत
चल चल रे सजणा गाऊया
प्रीतीफुलांनी न्हाऊया
येथे कुणी ना अशा सांजवेळी
वारा हळू हा साद घाली
वेलीवरी ऐसा आता
साज नवा आला नाथा
पानोपानी प्रेमगाणी वेचूया
लोचनांची वेडी भाषा
प्रीतिच्या युगाची आशा
रानीवनी मोहरुनी जाऊया
गीत – शांताराम नांदगांवकर
संगीत – अशोक पत्की
स्वर- राणी वर्मा
गीत प्रकार – भावगीत
दर्यावरी रं तरली होरी रं
तुझीमाझी जोरी बरी
साजणा, होरीतून जाऊ घरी
पान्यावानी पिरत तुझी
झाला माझा जीव राजी
धावलं मन येड्यापरी
मायेच्या रं घराच्या या वाटंवरी
साजणी, आता नको जाऊ दुरी
मासोलीचं डोलं तुझं
जाल्यावानी मन माझं
घावलं, परडी भरली
गोमुच्या ग पिरतीच्या या मासोलीनं
साजणा, जाऊ नको दुरी
शिडातुनी आयला वारा
होरीला गो नाही थारा
नाखवा घोर नको काळजाला
कोलीवाडा अंगाशी रं आता आयला
साजणी, होरीतुनी जाऊ घरी
गीत – शांताराम नांदगांवकर
संगीत – प्रदीप-विलास
स्वर- श्यामा चित्तार, हेमंतकुमार
गीत प्रकार – कोळीगीत, युगुलगीत