कधी कुठे न भेटणार
कधी न काही बोलणार
कधी कधी न अक्षरात
मन माझे ओवणार
निखळे कधी अश्रू एक
ज्यात तुझे बिंब दिसे
निखळे निःश्वास एक
ज्यात तुझी याद असे
पण तिथेच ते तिथेच
मिटुन ओठ संपणार
व्रत कठोर हे असेच
हे असेच चालणार
गीत – इंदिरा संत
संगीत – गजानन वाटवे
स्वर- रंजना जोगळेकर
गीत प्रकार – भावगीत
नको नको रे पावसा असा धिंगाणा अवेळी
घर माझे चंद्रमौळी आणि दारात सायली
नको नाचू तडातडा अस्सा कौलारावरून
तांबे सतेली पातेली, आणू भांडी मी कोठून
नको करू झोंबाझोंबी, माझी नाजूक वेलण
नको टाकू फूलमाळ अशी मातीत लोटून
आडदांडा नको येऊ झेपावत दारातून
माझं नेसूचं जुनेर नको टाकू भिजवून
किती सोसले मी तुझे, माझे एवढे ऐकना
वाटेवरी माझा सखा, त्याला माघारी आण ना
वेशीपुढे आठ कोस, जा रे आडवा धावत
विजेबाई कडाकडून मागे फिरव पांथस्थ
आणि पावसा राजसा, नीट आणी सांभाळून
घाल कितीही धिंगाणा मग मुळी न बोलेन
पितळेची लोटीवाटी तुझ्यासाठी मी मांडीन
माझ्या सख्याच्या डोळ्यांत तुझ्या विजेला पूजीन
गीत – इंदिरा संत
संगीत – यशवंत देव
स्वर-
गीत प्रकार – ऋतू बरवा, भावगीत