तार वाजे काळजाची
ओवी सुचे ज्ञानेशाची
आभाळाच्या कागदाची
सीमा झाली
इंद्रायणीचे वेल्हाळ
झुरुमुरू वाहे जळ
लाट होउनी निर्मळ
ओवी आली
समाधीस टेके माथा
चंद्र वेचिला मी हाता
जणू सूर्यासही नवी
प्रभा आली
काळजाच्या अक्षराला
स्पर्श अमृताचा झाला
जणू मुक्या प्रतिभेला
वाचा आली
गीत – प्रवीण दवणे
संगीत – नंदू होनप
स्वर- पं. जितेंद्र अभिषेकी
गीत प्रकार – भक्तीगीत
वाट रेशमी फुलाफुलांत नाहते
बाहुपाशी राजसा बहरुनी विसावते
स्पर्श हा नवा, प्रीत ही शहारते
लाजण्यातुनी तुझ्या हळुच गूज सांडते
हवेतुनी सुगंध हा दरवळे पुन्हा
घडायचा पुन्हा पुन्हा लाजरा गुन्हा
पापण्या मिटून घे स्वप्न एक जागते
वादळे उरातली सांगती तुला
रेशमी वयात हा झुलायचा झुला
चंदनी वयातुनी धुकेच स्वैर वाहते
आसमंत हा वसंत आज वेगळा
अधीर मी मदिर तू गारवा खुळा
दुरावताच स्पर्श हे, कोण ओढ लाविते !
गीत – प्रवीण दवणे
संगीत – दीपक पाटेकर
स्वर- अनुराधा पौडवाल, सुरेश वाडकर
चित्रपट – अंगार
गीत प्रकार – चित्रगीत, युगुलगीत
या उदास कवितेवरती बघ श्वास तरंगत होता
मग दिशा कुसुंबी झाल्या अन् प्राण कलंडत होता
हलकेच उडाली धूळ, शपथेला रंगही हळवा
मी वळून पाहिले तेव्हा नुसताच लहरला मरवा
या निळसर वातावरणी तो नुसता स्फुंदत होता
हे रान गर्द भवताली, डोहात सावल्या जमल्या
गावात नव्या दु:खाच्या, स्वप्नात कशाला रमल्या
वार्यावर सोडुनी वचने सहवास भणंगत होता
हा नुसता कागद कोरा, तू नजर टाकुनी जा ना
क्षितिजावर उमटे तारा तो तुझाच एक बहाणा
माझ्याच मनाच्या पदरी हलकेच विहंगत होता
गीत – प्रवीण दवणे
संगीत – यशवंत देव
स्वर- अरुण दाते
गीत प्रकार – भावगीत
चल् झेलूया गाणे, वासंतीक उखाणे
कांचनआशा बहरुन आल्या वयात आली राने !
गर्भरेशमी पाऊलवाटा कशा सुगंधी झाल्या?
जळथेंबाचा पाऊस नसुनी दिठीदिठीतुन न्हाल्या
हे कुठले अमृतदेणे? हे वासंतीक उखाणे
कांचनआशा बहरुन आल्या वयात आली राने !
पदराचा कापूर जाहला, हवेत उडतो बाई
डोळ्यांमधल्या स्वप्नांवरती रंग शिंपुनी जाई
हे पंख नसुनी उडणे, हे वासंतीक उखणे
कांचनआशा बहरुन आल्या वयात आली राने !
मंदिर झाले या हृदयाचे, दिशाच झाल्या बाहू
ओंजळीतला ऋतू फुलांचा कुठल्या चरणी वाहू?
हे तुझेच अक्षय लेणे, हे वासंतीक उखाणे
कांचनआशा बहरुन आल्या वयात आली राने !
गीत – प्रवीण दवणे
संगीत – शांक-नील
स्वर- सुमन कल्याणपूर
गीत प्रकार – भावगीत
दादा रुसला ताई रुसली, रुसली आज आई
काय करावे काही कळेना, बाई
म्हणती सारे आज मला, भली खोड की जिरली
शाळा सुटता धावत येता, स्वारी घसरून पडली
आई म्हणते, मला आजला कसली आहे घाई?
घाई कसली समजत नाही? लगीन बाहुलीचे !
आईलाही कसे कळेना मन हे आईचे !
माझी छकुली नवरी झाली, आज सासरी जाई
हसती सारे मोठ्याने पण डोळा माझ्या पाणी
नवरदेव हा किती धिटुकला, घेऊन जाई राणी
कशी कळेना घडली बाई घाईत ही नवलाई
गीत – प्रवीण दवणे
संगीत – नंदू होनप
स्वर- देवकी पंडित
गीत प्रकार – बालगीत
घन करुणेचा सूर, तयांतून भरु दे अवघा ऊर
शांत शांत हलकेच होऊ दे, जिवातले काहूर
अरूपाला मी साद घालता
गूढ निलायम मौन बोलता
नश्वर वितळून ईश्वर उजळो, साधनेस दे नूर
पाषाणातून झरू दे जीवन
असे वाहू दे स्वर संजीवन
ऐल पैल हे मुळी नसावे, असा जागू दे पूर
गीत – प्रवीण दवणे
संगीत – केदार पंडित
स्वर- पं. संजीव अभ्यंकर
अल्बम – जीवनरंग
गीत प्रकार – भावगीत