श्रावणझड बाहेरी
मी अंतरि भिजलेला
मिटून चोच पंखातच
एक पक्षि निजलेला
अभ्रांचा हृदयभार
थेंब थेंब पाझरतो
विझलेला लांब दिवस
चिंब होत ओसरतो
उथळ उथळ पल्वलांत
संगळून जळ बसते
क्षणजीवी वर्तुळांत
हललेसे भासविते
चळते प्रतिबिंब जरा
स्थिर राहून थिजताना
बिंदुगणिक उठलेले
क्षीण वलय विरताना
झिमझिम ही वार्यासह
स्थायी लय धरून असे
संमोहन निद्रेतून
शब्दांना जाग नसे
गीत – कवी अनिल
संगीत – आनंद मोडक
स्वर- हृषिकेश रानडे
गीत प्रकार – कविता, ऋतू बरवा
थकले रे डोळे माझे
वाट तुझी पाहता
वाट तुझी पाहता रे
रात्रंदिन जागता
सुकला रे कंठ माझा
तुज आळविता
तुज आळविता रे
नाम तुझे जपता
आटले रे अश्रु माझे
वाहता वाहता
वाहता वाहता रे
आठवणी काढता
शिणला रे जीव माझा
तुजविण राहता
तुजविण राहता रे
तुज नच भेटता
गीत – कवी अनिल
संगीत – यशवंत देव
स्वराविष्कार- ∙ उषा मंगेशकर∙ ज्योत्स्ना भोळे( गायकांची नावे कुठल्याही विशिष्ट क्रमाने दिलेली नाहीत. )
गीत प्रकार – भावगीत, नयनांच्या कोंदणी
टीप – • स्वर- उषा मंगेशकर, संगीत- यशवंत देव.• स्वर- ज्योत्स्ना भोळे, संगीत- केशवराव भोळे.
.
गगनी उगवला सायंतारा
मंद सुशीतळ वाहत वारा
हांक तुझी मज स्पष्ट ऐकु ये
येइ सखे ये, बैस जवळि ये
गगनी उगवला सायंतारा
घाल गळां मम तव कर कोमल
पसरूं दे श्वासाचा परिमल
घेइ मम हृदयांत निवारा
गगनी उगवला सायंतारा
बैस जवळी ये, बघ ही पश्चिम
कोमल रंगी खुलली अनुपम
ये नेत्री ते घेवू साठवुनी
गालावरती गाल ठेवुनी
गगनी उगवला सायंतारा
उदासीनता विसर जगाची
तुझाच मी, तूं माझी सदाची
विरले हृदयांतरी बघ अंतर
तू आणिक मी जवळ निरंतर !
गगनी उगवला सायंतारा
गीत – कवी अनिल
संगीत – गजानन वाटवे
स्वर- गजानन वाटवे
गीत प्रकार – भावगीत