इचार काय हाय तुमचा हो पाव्हणं
इचार काय हाय तुमचा?
डोळं रोखून असं काय बघता हो पाव्हणं
इचार काय हाय तुमचा?
नाही ओळख नाही नातं
कधी झाली नाही भेट
एकटीला पाहून रस्त्यात गाठून
येड्यावानी चाळा करता
रोज येऊन मागं मागं
मन केलं तुम्ही माझं जागं
भुलवून अशी पाडलंत फशी
दुरुन हाका काय मारता?
जर असंल माझ्यावर माया
नका येळ घालवू वाया
रातच्यापारी आज माझ्या घरी
मला हळूच येऊन भेटा
गीत – राम मोरे
संगीत – विश्वनाथ मोरे
स्वर- रोशन सातारकर
गीत प्रकार – लावणी
तळ्यात पाही पुनव चांदवा होऊन गोरामोरा
आणि सरीची सतार घेऊन निल-घन छेडी तारा
वेलीवरल्या मुक्या कळीला जाग हळू ही आज
जळवंतीच्या जळात भिजतो गंधवतीचा साज
दंवबिंदूंचे उधळीत मोती भणंग होई वारा
निवांत निजली नगरी सारी जागत बसले दिवे
हिरव्या रानी रात्र खेळवी फूलपाखरी थवे
रात्र चांदणी चोरपाउली उजळी घन अंधारा
अशाच वेळी संयम सरतो, जडते अनाम बाधा
जडता अनाम बाधा होई लाट तळ्यांतिल राधा
भरात येता भरती बुडतो बेहोषीत किनारा
गीत – राम मोरे
संगीत – दशरथ पुजारी
स्वर- उषा वर्तक
गीत प्रकार – शब्दशारदेचे चांदणे, भावगीत
या झोपल्या जगात, नाही कुणीच जागे
बिलगूनिया धरेला आकाश गुज सांगे
माळून हार डोई रानातल्या फुलांचा
ल्याली वसुंधरा ही अभिसार चांदण्याचा
मधुवंतीचा सुवास वार्‍यावरी तरंगे
स्वप्‍नील लोचनांत झुकता हळूच चांद
देहातुनी सुरेख घुमला मधूर नाद
निःशब्द रात्र जाई गुंफीत प्रीतिधागे
आली फुलून काया कंपीत गात्र झाले
बेबंद बरसणारे मन मेघ मेघ झाले
होती भल्या पहाटे ती एकरूप दोघे
गीत – राम मोरे
संगीत – दशरथ पुजारी
स्वर- सुमन कल्याणपूर
गीत प्रकार – भावगीत
बरस रे घना
तूच आज शमवी तृषीत माझिया मना
पवन अति दाहक हा
छळी मजला तूच पहा
रात्र रात्र लोचनांत नीज येईना
चिंब चिंब भिजव मला
झुलवीत तारुण्य झुला
तुजवाचून जाणी कोण सर्व वेदना
गीत – राम मोरे
संगीत – दशरथ पुजारी
स्वर- उषा मंगेशकर
गीत प्रकार – ऋतू बरवा, भावगीत
डार्लिंग डार्लिंग काय म्हनतोस?
भलताच बाईल येडा दिसतोस !
रूप बावळं झिपरं केस
हिप्पीवानी सारा वेष
घर ना दार
भुईला भार
घरावर चकरा काय मारतोस?
दारु-मटक्याचा नाद तुला
चोरीचीही ठाव कला
पत्त्याचा इमला
तुला ना जमला
महालाची बात आता काय करतोस?
नार मी मोठ्या घरची रं
बापही माझा पाटील रं
साधुन मोका
मारतोस धक्का
हातांत इस्तव काय धरतोस?
गीत – राम मोरे
संगीत – विश्वनाथ मोरे
स्वर- रोशन सातारकर
गीत प्रकार – लावणी