हले हा नंदाघरी पाळणा
त्यांत देखणा गोजिरवाणा
हसतो गोकुळराणा
ओठ लाल ते डोळे चिमणे
हास्यातुन त्या फुले चांदणे
स्वरूप सुंदर लोभसवाणे
मोहुन घेई मना
बोल बोबडे ते भाग्याचे
शब्द वाटती ते वेदांचे
रुणझुणताती घुंगुरवाळे
ये धेनूंना पान्हा
नंद-यशोदा करिती कौतुक
आनंदाचे अमाप ते सुख
मायपित्यांविण कसे कळावे
सौख्य तयाचे कुणा?
गीत – मधुकर जोशी
संगीत – वसंत प्रभु
स्वर- सुमन कल्याणपूर
गीत प्रकार – हे श्यामसुंदर, भावगीत
जगी ज्यास कोणी नाही त्यास देव आहे
निराधार आभाळाचा तोच भार साहे
बाळ सोडुनी ते दिधले कुंतीने जळात
घरी रधिकेच्या परि ते वाढले सुखात
कर्णराज म्हणुनी त्याचे नाव अमर आहे
भक्त बाळ प्रह्लादाला छळीले पित्याने
नारसिंहरूपे त्याला रक्षिले प्रभुने
अलौकिक त्याची मूर्ती अजुनी विश्व पाहे
साधुसंत कबिराला त्या छळिति लोक सारे
पांडुरंग रक्षी त्याला प्राशुनी निखारे
आसवेच त्यांची झाली दुःखरूप दोहे
गीत – मधुकर जोशी
संगीत – दशरथ पुजारी
स्वर- सुमन कल्याणपूर
राग – बैरागी भैरव
गीत प्रकार – भक्तीगीत
झिमझिम झरती श्रावणधारा धरतीच्या कलशात
प्रियाविण उदास वाटे रात
बरस बरस तू मेघा रिमझिम
आज यायचे माझे प्रियतम
आतुरलेले लोचन माझे बघती अंधारात
प्रासादी या जिवलग येता
कमळमिठीमधे भृंग भेटता
बरस असा की प्रिया न जाईल माघारी दारात
मेघा असशी तू आकाशी
वर्षातुन तू कधी वर्षसी
वर्षामागुन वर्षती नयने करती नित्‌ बरसात
गीत – मधुकर जोशी
संगीत – दशरथ पुजारी
स्वर- सुमन कल्याणपूर
राग – सारंग, सरस्वती
गीत प्रकार – ऋतू बरवा, भावगीत
ओठांवरती रोज प्रभाती घ्यावे मंगल नाम
रघुपति राघव राजाराम
सुरेखसे ते संगमरवरी
पंचानन ते मम देव्हारी
हनुमंतासम हात जोडुनी पूजावा घनश्याम
पंचवटीच्या पाषाणांतुन
नाम ऐकु ये श्रीरघुनंदन
गोदातीरी पर्णकुटीचे ज्याचे सुंदर धाम
भूलोकी या ऋषी वाल्मीकी
राम दर्शने होइ सार्थकी
परमार्थाचा मार्ग दाविती माझे प्रभु श्रीराम
गीत – मधुकर जोशी
संगीत – श्रीनिवास खळे
स्वर- निर्मला गोगटे
गीत प्रकार – राम निरंजन, भक्तीगीत
थंडगार ही हवा त्यात धुंद गारवा
अशा सुरेख संगमी जवळ तू मला हवा !
निळ्या नभात चालली दूरदूर पाखरे
दूर ना जरी तुझ्या जीव अंतरी झुरे
अंतरात बोलतो अबोल प्रीत पारवा
संथ या जलाशयी गात गान कमलिनी
हळूच लाजता मनी फुलत राग-रागिणी
गंध त्यात चंदनी स्वरांत येई गोडवा
फूल प्रीतिचे कुणा अनामिकास वाहते
मुग्धता परि मना नवेच काही सांगते
अशा सुरम्य संभ्रमी भास आगळा नवा
गीत – मधुकर जोशी
संगीत – राम कदम
स्वर- आशा भोसले
चित्रपट – एक धागा सुखाचा
राग – पहाडी
गीत प्रकार – चित्रगीत