झाल्या तिनीसांजा करुन सिणगार

झाल्या तिनीसांजा करुन सिणगार साजा
वाट पहाते मी ग येणार साजन माझा

प्रीतीच्या दरबारीचं येणार सरदार
मायेच्या मिठीचा त्यांच्या गळ्यात घालीन हार
दिलाच्या देव्हार्‍यात बांधीन मी पूजा
वाट पहाते मी ग येणार साजन माझा

भेटीत रायाच्या सांगेन मी सारं
सोसवेना बाई मला यौवनाचा भार
तान्हेल्या हरणीला हळूच पाणी पाजा
वाट पहाते मी ग येणार साजन माझा

त्यांच्याच ओठांचा ओठी रंग लाल
आठवणीने त्यांच्या बाई रंगले हे गाल
धुंद व्हावी राणी, रंगून जावा राजा
वाट पहाते मी ग येणार साजन माझा

वाटतं सख्याचं वाजलं पाऊल
खट्याळ मनाला लागे खोटीच चाहूल
घालू कशी मी साद होईल गाजावाजा
वाट पहाते मी ग येणार साजन माझा

इचारच पडला बिचार्‍या मनाला
येळ का ग व्हावा बाई सख्या सजनाला
बिलगून बसावी शंभूला सारजा
वाट पहाते मी ग येणार साजन माझा

गीत – दादा कोंडके

संगीत – रामलक्ष्मण

स्वर- उषा मंगेशकर

चित्रपट – तुमचं आमचं जमलं

गीत प्रकार – चित्रगीत

अंजनीच्या सुता तुला

अंजनीच्या सुता तुला रामाचं वरदान
एक मुखाने बोला, बोला जय जय हनुमान

दिव्य तुझी राम भक्ती, भव्य तुझी काया
बालपणी गेलासी तू सूर्याला धराया
हादरली ही धरणी, थरथरले आसमान

लक्ष्मणा आली मूर्च्छा लागुनिया बाण
द्रोणागिरीसाठी राया केले तू उड्डाण
तळहातावर आला घेउनी पंचप्राण

सीतामाई शोधासाठी गाठलीस लंका
तिथे रामनामाचा तू वाजविला डंका
दैत्य खवळले सारे परि हसले बिभिषण

हार तुला नवरत्‍नांचा जानकीने घातला
पाहिलेस फोडुन मोती राम कुठे आतला
उघडुनी आपली छाती दाविले प्रभु भगवान

आले किती, गेले किती, संपले भरारा
तुझ्या परि नावाचा रे अजुनी दरारा
धावत ये लवकरी, आम्ही झालो रे हैराण

धन्य तुझे रामराज्य, धन्य तुझी सेवा
तुझे भक्त आम्ही सारे उपाशी का देवा?
घे बोलावून आता कंठाशी आले प्राण

गीत – दादा कोंडके

संगीत – रामलक्ष्मण

स्वर- महेंद्र कपूर

चित्रपट – तुमचं आमचं जमलं

गीत प्रकार – भक्तीगीत, चित्रगीत

चल रं शिरपा, देवाची किरपा झाली

चल रं शिरपा, देवाची किरपा झालीया औंदा छान रं छान
गाऊ मोटंवरचं गाणं

चल माज्या राजा, चल रं सर्जा बिगीबिगी, बिगीबिगी डौलानं डौलानं
गाऊ मोटंवरचं गाणं

मोट चालली मळ्यात माज्या चाक वाजतंय कुईकुई
पाटाचं पानी झुळझुळवानी फुलवित जातंय जाईजुई
धरतीमाता येईल आता नेसून हिरवं लेणं रं लेणं
गाऊ मोटंवरचं गाणं

गाजर मुळा नि केळी रताळी माघातला हरभरा
पडवळ काकडी वांगी वालपापडी मक्याचा डुलतोय तुरा
कोथमिर घेवडा सुवासी केवडा उसाचं लावलंय बेणं रं बेणं
गाऊ मोटंवरचं गाणं

उसाचं पीक आलंय जोसात औंदा
अरं देईल बरकत मिरची नी कांदा
वाटाणा भेंडी तेजीचा सौदा
खुशीत गातुया शेतकरी दादा
गव्हाची ओंबी वार्‍याशी झोंबी करतिया पिरमानं पिरमानं
गाऊ मोटंवरचं गाणं

गीत – दादा कोंडके

संगीत – प्रभाकर जोग

स्वर- जयवंत कुलकर्णी

चित्रपट – आंधळा मारतो डोळा

गीत प्रकार – चित्रगीत, लोकगीत