जन्मोजन्मी तुम्हीच यावे माझ्या संसारी
एकच आशा सदैव राहील अखेरची ह्या उरी
अलंकार सोन्याचे मजला नकोत माणिकमोती
शपथ गळ्याची तुमच्या घ्यावी माझी पूरी कसोटी
महालात जन्मले, वाढले वैभवात मी जरी
मंगल सौभाग्याचा ठेवा तुमच्या चरणांमधी
अखंड वाहील प्रीतीची का निर्मळ गंगा मधी
युगायुगांच्या गाठीभेटी पडतील वरचेवरी
गीत – अनिल भारती
संगीत – मधुकर पाठक
स्वर- सुलोचना चव्हाण
गीत प्रकार – भावगीत
जनी नामयाची रंगली कीर्तनी
तोच चक्रपाणि धाव घेई
मुखी हरिनाम नेत्र पैलतीरी
देवाची पंढरी मोक्ष वाटे
दळिता कांडीता वाहता कावडी
चिंतनात गोडी विठ्ठलाच्या
चक्र टाकुनीया दळावे हरीने
भक्तांचे देवाने दास व्हावे
जुळो असे नाते जळो गर्व-हेवा
तुझी आस देवा पांडुरंगा
गीत – अनिल भारती
संगीत – दशरथ पुजारी
स्वर- माणिक वर्मा
राग – भैरवी
गीत प्रकार – विठ्ठल विठ्ठल, भक्तीगीत
आज अचानक एकाएकी
मानस लागे तेथे विहरू
खेड्यामधले घर कौलारू
पूर्वदिशेला नदी वाहते
त्यात बालपण वहात येते
उंबरठ्याशी येउन मिळते
यौवन लागे उगा बावरू
माहेराची प्रेमळ माती
त्या मातीतुन पिकते प्रीती
कणसावरती माणिकमोती
तिथे भिरभिरे स्मृती-पाखरू
आयुष्याच्या पाऊलवाटा
किती तुडविल्या येताजाता
परि आईची अठवण येता
मनी वादळे होति सुरू
गीत – अनिल भारती
संगीत – मधुकर पाठक
स्वर- मालती पांडे
गीत प्रकार – भावगीत
बादशहाच्या अमर प्रीतिचे मंदिर एक विशाल
यमुनाकाठीं ताजमहाल
मूर्तिमंत झोपली प्रीत अन् मृत्यूचे ओढून पांघरूण
जीवन कसले महाकाव्य ते गाइल जग चिरकाल
यमुनाकाठीं ताजमहाल
नि:शब्द शांती अवतीभवती, हिरे जडविले थडग्यावरती
एकच पणती पावित्र्याची जळते येथ खुशाल
यमुनाकाठीं ताजमहाल
हळूच या रसिकांनो येथे, नका वाजवू पाऊलांते
दिव्यदृष्टिला होइल तुमच्या मंगल साक्षात्कार
यमुनाकाठीं ताजमहाल
गीत – अनिल भारती
संगीत – गजानन वाटवे
स्वर- गजानन वाटवे
गीत प्रकार – भावगीत
या कातरवेळी,
पाहिजेस तू जवळी
एकटी मी दे आधार
छेड हळू हृदय-तार
ऐक आर्त ही पुकार
सांजवात ये उजळी
रजनीची चाहूल ये
उचलुनिया अलगद घे
पैलतिरी मजला ने
पुसट वाट पायदळी
शिणले रे, मी अधीर
भवती पसरे तिमिर
व्याकुळ नयनांत नीर
मीलनाची आस खुळी
गीत – अनिल भारती
संगीत – मधुकर पाठक
स्वर- मालती पांडे
राग – यमन
गीत प्रकार – भावगीत
पडली भवानी जेव्हा म्यानाच्या बाहेरी
रणात फिरली ना ती कधीच माघारी
चमके शिवबाची तलवार !
तळपत्या बिजलीचा अवतार
झेले ढालीवरती वार
पडली भवानी जेव्हा म्यानाच्या बाहेरी
रणात फिरली ना ती कधीच माघारी
तख्त-दौलतीसमोर केली ना लाचारी
कधी न झुकली ती दिल्लीच्या दरबारी
तमाम बादशाहीचा ताज तिने ठोकरला
मराठमोळ्याचा वेष तिने पांघरला
धर्मरक्षणासी सदा सज्ज भवानी झाली
जुलुमकर्त्याच्या रक्ताने ती न्हाली
महाराष्ट्रावर प्रेम अपार
उघडण्या स्वातंत्र्याचे द्वार
चमके शिवबाची तलवार !
शाहिस्तेखान म्हणाला दिल्ली दरबारी
“हुजुर करतो मी महाराष्ट्रावर स्वारी”
पुण्यात शाहिस्ता वस्तीला मग आला
शिवाजी लागे अजमावयास शत्रूला
शाहिस्त्याच्या घरात शिवबा रात्री शिरले
बघुन मर्द शिवा, खान मनी घाबरले
केला शिवबाने गनिमी काव्याने हल्ला
शाहिस्ता बोलतसे, “या तौबा, या अल्ला !”
केला शाहिस्त्यावर वार
त्याची तुटली बोटे चार
चमके शिवबाची तलवार !
तेव्हा अफझुलखाना क्रोध भारी मग चढला
कसम खाउनी घराबाहेरी तो पडला
“पहाड का चुहा है शिवाजी फिर भी बच्चा
मगर मैं बादशाह का बंदा हूं सच्चा”
बलिष्ट शत्रूला शिवबाने ओळखले
प्रतापगडाशी स्वत: भेटीला ते आले
“आओ मिलो हम से ।” म्हणुनी,
खान भिडे शिवबाला
करून धोका अफझुल करी वाराला
झाला शिवराया हुश्शार
केला क्षणांत अफझुल ठार
चमके शिवबाची तलवार !
गीत – अनिल भारती
संगीत – मधुकर पाठक
स्वर- कृष्णा शिंदे
गीत प्रकार – लोकगीत, प्रभो शिवाजीराजा