हरी अधरी, धरी मुरली
निनादत नाद कुंजवनी
मधुर मधुमास, पुरवी आस
रचिला रास गोपांनी
टिपरी वाजे, झांज वाजे, वाजतो मृदंग
नाचे तन, नाचे मन, नाचे अंतरंग
छन छननन छन छननन ताल पैंजणांतुनी
रचिला रास गोपांनी
लखलखती भवताली रम्य दीपज्योती
वदनांवर सर्वांच्या आगळीच कांती
नाचते राधिका देहभान हरपुनी
रचिला रास गोपांनी
गीत – शान्ता शेळके
संगीत – बाळ पळसुले
स्वर- आशा भोसले
चित्रपट – सासुरवाशीण
गीत प्रकार – चित्रगीत, हे श्यामसुंदर
झुलतो झुला, जाई आभाळा
झुल्यासंगे झुलताना खुलतो ग बाई गळा !
लिंबाच्या फांदीला
झुला मी बांधिला
रेशमाचे लाल गोंडे माझ्या झुल्याला !
खालती वरती
वार्याला भरती
विमानांच्या वेगे माझा झुला चालला !
झुल्याच्या संगती
सूरही रंगती
वारा नेई माझे गाणे दूर देशाला !
गीत – शान्ता शेळके
संगीत – सी. रामचंद्र
स्वर- सुषमा श्रेष्ठ
गीत प्रकार – बालगीत
झाला साखरपुडा ग बाई थाटाचा
रुणुझुणु चुडा हाती गाईल ग
शालू चमचम करील जरीकाठाचा
सांग माझ्या कानात नवरा कसा
शूर मर्द का भितरा ससा
रूप मदन का हुप्प्या जसा
बृहस्पती का येडापीसा
ऐक सांगते तिकडची स्वारी
रूप देखणं, नजर करारी
मर्द मावळ्या मुलुखामधुनी
गर्जत जाई गरुडभरारी
नगं बाई.. काय ग?
दिमाग अशी दाऊ ग
स्वर्ग झाला तुला ग दोन बोटांचा
झाला साखरपुडा !
नाकाचा सांडगा, गालाचा पापड
दळुबाई-कांडुबाई म्हणत्यात तसा
केळीच्या पानाला तूप लावुनी
वाढल्या शेवया खाईल कसा
शूर मराठा स्वार फाकडा
ऐट दावतो थाट रांगडा
ढाल पाठीवर हातात भाला
स्वारी जाते मुलुखगिरीला
नगं बानू.. नगं बानू
रूपाला अशी भाळू नगं
कसा येईल फुलाला रंग देठाचा
झाला साखरपुडा ग बाई थाटाचा
गीत – शान्ता शेळके
संगीत – आनंदघन
स्वर- उषा मंगेशकर, लता मंगेशकर
चित्रपट – मोहित्यांची मंजुळा
गीत प्रकार – चित्रगीत
खवळून उठले साती सागर
बुडली धरती बुडले अंबर
प्रलयानंतर वटपत्रावर
पुन्हा संभवे नवीन सृष्टी
नको मानवा होऊ कष्टी !
मोडून पडता इवले घरटे
दुबळ्या पंखी बळ संचरते
काडी काडी चोच जमविते
पुन्हा निवारा घरट्यापोटी
नको मानवा होऊ कष्टी !
विनाश तेथे पुन्हा निर्मिती
जन्म मात करी मरणावरती
फिरुनी मानवकुळे नांदती
मधुर भविष्ये बघते दृष्टी
नको मानवा होऊ कष्टी !
हात राबता तो परमेश्वर
संसाराची ओढ अनावर
राखेमधुनी उभव पुन्हा घर
करी जीवनी अमृतवृष्टी
नको मानवा होऊ कष्टी !
गीत – शान्ता शेळके
संगीत – हेमंत केदार
स्वर- तलत महमूद
चित्रपट – तोचि साधू ओळखावा
गीत प्रकार – चित्रगीत
क्षणभर भेट आपुली झाली !
ओळख नव्हती मुळीच अपुली
नजर मात्र नजरेला भिडली
खुणा आंतरिक पटुनी काही हसू उमटले गाली
गूढ भाव नेत्रांत तरळले
रहस्य अपुले आपणा कळले
अनोळखीपण आड कशाला येईल मग त्या काली?
दूर उभा तू जरी मजपासुनी
अंतर मधले गेले तुटुनी
स्पर्शसुखाची दुरून आपण अनुभवलीच नव्हाळी
परिचय अपुला नसोच नसला
लौकिक परिचय हवा कुणाला?
युगायुगांची क्षणांत जर का ओळख जिवास पटली
गीत – शान्ता शेळके
संगीत – जी. एन्. जोशी
स्वर- जी. एन्. जोशी
गीत प्रकार – भावगीत
ल ल्ला लला ललला, ल ल्ला लला ललला
पप्पा सांगा कुणाचे? पप्पा माझ्या मम्मीचे !
मम्मी सांगा कुणाची? मम्मी माझ्या पप्पांची !
इवल्याइवल्या घरट्यात, चिमणाचिमणी राहतात
चिमणाचिमणी अन् भवती चिमणी पिल्लेही चिवचिवती !
आभाळ पेलते पंखांवरी, पप्पांना घरटे प्रिय भारी
चोचीत चोचीने घास द्यावा, पिल्लांचा हळूच पापा घ्यावा !
पंखाशी पंख हे जुळताना, चोचीत चोचही मिळताना
हासते नाचते घर सारे, हासते छ्प्पर-भिंती-दारे !
गीत – शान्ता शेळके
संगीत – सी. रामचंद्र
स्वर- अरुण सरनाईक, राणी वर्मा, प्रमिला दातार
चित्रपट – घरकुल
गीत प्रकार – बालगीत, चित्रगीत
ऋतु हिरवा ऋतु बरवा, पाचूचा वनि रुजवा
युगविरही हृदयावर सरसरतो मधूशिरवा
भिजुनी उन्हे चमचमती, क्षण दिपती क्षण लपती
नितळ निळ्या अवकाशी मधुगंधी तरल हवा
मनभावन हा श्रावण, प्रियसाजण हा श्रावण
भिजवी तन भिजवी मन हा श्रावण
थरथरत्या अधरांवर प्रणयी संकेत नवा
नभी उमटे इंद्रधनू, मदनाचे चाप जणू
गगनाशी धरणीचा जुळवितसे सहज दुवा
गीत – शान्ता शेळके
संगीत – श्रीधर फडके
स्वर- आशा भोसले
राग – चारुकेशी
गीत प्रकार – ऋतू बरवा, भावगीत
शारद सुंदर चंदेरी राती स्वप्नांचा झुलतो झुला
थंड या हवेत घेऊन कवेत साजणा झुलव मला
साजणा रे, मोहना रे, ऐकना रे
तुझ्याचसाठी रे तुझ्याचसाठी
सगेसोयरे मी सांडिले पाठी
मोहन मधुर राती
भराला येऊ दे प्रीती
प्रीतीची हीच ना रीती?
कशाला कुणाची भीती?
झाडामागे चांद हा वरती आला
ये ना, ये ना? आतुर जीव हा झाला
मी भूलावे, स्वैर व्हावे, गीत गावे
वार्यात लहर मंद
फुलांचा मादक गंध
मोगरा चमेली कुंद
जिवाला करिती धुंद
माझ्या देही पुनवचांदणे साजे
प्राणांमध्ये प्रीतीची पावरी वाजे
आज राया, धुंद काया, मोहवाया
गीत – शान्ता शेळके
संगीत – हेमंत भोसले
स्वर- आशा भोसले
गीत प्रकार – शब्दशारदेचे चांदणे, कल्पनेचा कुंचला, भावगीत
शालू हिरवा पाच नि मरवा वेणी तिपेडी घाला
साजणी बाई येणार साजण माझा !
गोर्या भाळी चढवा जाळी नवरत्नांची माळा
साजणी बाई येणार साजण माझा !
चूलबोळकी इवलीइवली भातुकलीचा खेळ ग
लुटूपुटीच्या संसाराची संपत आली वेळ ग
रेशिमधागे ओढिती मागे व्याकुळ जीव हा झाला
सूर गुंफिते सनई येथे झडे चौघडा दारी
वाजतगाजत मिरवत येईल घोड्यावरुनी स्वारी
मी वरमाला घालीन त्याला मुहूर्त जवळी आला
मंगलवेळी मंगलकाळी डोळा का ग पाणी?
साजण माझा हा पतिराजा मी तर त्याची राणी
अंगावरल्या शेलारीला बांधीन त्याचा शेला
गीत – शान्ता शेळके
संगीत – पं. हृदयनाथ मंगेशकर
स्वर- उषा मंगेशकर
गीत प्रकार – भावगीत
सोशिक माती अशी सारखी वर्षावाने भिजे
युगायुगांची उत्कट आशा अक्षर होऊन रूजे
केव्हा हसणे, केव्हा रडणे, कधी सोसणे कळा
असा चालला इथे सनातन सृजनाचा सोहळा
कशी मनातून मने गुंतती भाव दाटती उरी
उन्हात न्हाऊन सुंदर होऊन येती श्रावणसरी
जळथेंबानी कशी चमकते सृष्टी ही साजरी
कधी हासर्या, कधी लाजर्या, आल्या श्रावणसरी
गीत – शान्ता शेळके
संगीत – नरेंद्र भिडे
स्वर- आशा भोसले
गीत प्रकार – मालिका गीते
टीप – • शीर्षक गीत, मालिका- श्रावणसरी, वाहिनी- झी मराठी.
टप टप टप टप टाकित टापा चाले माझा घोडा
पाठीवरती जीन मखमली पायि रुपेरी तोडा !
उंच उभारी दोन्ही कान
ऐटित वळवी मान-कमान
मधेच केव्हा दुडकत दुडकत चाले थोडा थोडा !
घोडा माझा फार हुशार
पाठीवर मी होता स्वार
नुसता त्याला पुरे इशारा, कशास चाबुक ओढा !
सात अरण्ये समुद्र सात
ओलांडिल हा एक दमात
आला आला माझा घोडा, सोडा रस्ता सोडा !
गीत – शान्ता शेळके
संगीत – सी. रामचंद्र
स्वर- सुषमा श्रेष्ठ
गीत प्रकार – बालगीत
तळमळतो मी इथे तुझ्याविण
शून्य जाहले अवघे जीवन !
गीत उमलले माझ्या ओठी
गाइलेस तू ते मजसाठी
जुळता जुळता रेशीमगाठी
तुटले अवचित कोमल बंधन !
माळ ओघळे फूल ओविता
कवन भंगले शब्द गोविता
स्वप्न लोपले बघता बघता
असह्य आता हे जागेपण !
कळे मलाही तुझी वेदना
साद परि मी देउ शकेना
झाले गेले विसर साजणा !
गीत – शान्ता शेळके
संगीत – राम कदम
स्वर- सुधीर फडके, सुमन कल्याणपूर
चित्रपट – भाग्यलक्ष्मी
गीत प्रकार – चित्रगीत, युगुलगीत
वहिनी माझी हसली ग वहिनी माझी हसली
आजवरी जी दादावरती उगाच होती रुसली
वहिनी हसता कणकण हासे
भवती सांडले सोनकवडसे
घरदाराला फुटले हासू नवीन शोभा दिसली
वहिनी हसता हसले अंगण
अंगणातले अन् वृंदावन
वहिनी पाणी घालू लागता तुळस कशी रसरसली
वहिनी हसता हसले घुसळण
ताकावर ये लोणी उसळुन
खुदुखुदु हसतो भात चुलीवर उकळी फुटली कसली?
हासत हासत पदर बांधुनी
भरभर कामे करते वहिनी
तो शकुनाचा हात लागता घरी लक्षुमी दिसली
हसू वहिनीच्या गाली दिसता
दादा हसला वहिनी हसता
हरवुन गेली होती गंमत फिरुनी आज गवसली
गीत – शान्ता शेळके
संगीत – राम कदम
स्वर- सुमन कल्याणपूर
चित्रपट – भाग्यलक्ष्मी
गीत प्रकार – चित्रगीत
अजब सोहळा ! अजब सोहळा !
माती भिडली आभाळा !
मुकी मायबाई
तिला राग नाही
तुडवून पायी तिचा केला चोळामोळा !
किती काळ साहील?
किती मूक राहील?
वादळली माती करी वार्याचा हिंदोळा !
कुणी पाय देता
चढे धूळ माथा
माणसा रे आता बघ उघडून डोळा !
गीत – शान्ता शेळके
संगीत – भास्कर चंदावरकर
स्वर- रवींद्र साठे
चित्रपट – गारंबीचा बापू
गीत प्रकार – चित्रगीत
चल ग सई चल चल बाई
गौराई आल्यात सोन्याच्या पायी
गौराई तुमची पुण्याई मोठी
चढून यावं अंगण ओटी
तुमच्या सांगाती लक्ष्मी येई
गौराई तुमचे पाऊलठसे
घरात दारात उठले कसे
सुखाची बरसात अवघ्या ठायी
गौराई कोठीत पाऊल ठेवा
धान्यानं कुणगा भरून जावा
धनाला आता कमती नाही
सैपाकघरात गौराई बसा
चुलीला द्यावा अन्नाचा वसा
सुखाचा घास मुखात जाई
हातात चुडा कपाळी कुंकू
तुमच्या कृपेनं काळाला जिंकू
झुकते पायी ठेवते डोई
गीत – शान्ता शेळके
संगीत – बाळ पळसुले
स्वर- आशा भोसले
चित्रपट – सासुरवाशीण
गीत प्रकार – चित्रगीत
छेडियल्या तारा
ते गीत येईना जुळून !
फुलते ना फूल तोच
जाय पाकळी गळून !
आकारून येत काही
विरते निमिषात तेही
स्वप्नचित्र पुसुनि जाय
रंग रंग ओघळून !
क्षितिजाच्या पार दूर
मृगजळास येई पूर
लसलसते अंकूर हे
येथ चालले जळून !
गीत – शान्ता शेळके
संगीत – पं. जितेंद्र अभिषेकी
स्वराविष्कार- ∙ पं. वसंतराव देशपांडे∙ शौनक अभिषेकी( गायकांची नावे कुठल्याही विशिष्ट क्रमाने दिलेली नाहीत. )
नाटक – हे बंध रेशमाचे
राग – मिश्र मांड
गीत प्रकार – नाट्यसंगीत
दाटून कंठ येतो ओठांत येई गाणे
जा आपुल्या घरी तू, जा लाडके सुखाने !
हातात बाळपोथी ओठांत बाळभाषा
रमलो तुझ्यासवे मी गिरवीत श्रीगणेशा
वळवून अक्षरांना केले तुला शहाणे
जातो सुखावुनी मी त्या गोड आठवाने !
बोलांत बोबडीच्या संगीत जागविले
लय-ताल-सूर लेणे सहजीच लेववीले
एकेक सूर यावा न्हाऊन अमृताने
अवघ्याच जीवनाचे व्हावे सुरेल गाणे !
घेऊ कसा निरोप? तुटतात आत धागे
हा देह दूर जाता मन राहणार मागे !
धन आत्मजा दुजाचे ज्याचे तयास देणे
परक्यापरी अता मी येथे फिरून येणे
गीत – शान्ता शेळके
संगीत – अनिल-अरुण
स्वर- पं. वसंतराव देशपांडे
चित्रपट – अष्टविनायक
गीत प्रकार – चित्रगीत
दाटतो हृदयी उमाळा खोल फुटतो हुंदका
प्राण कंठी येती तरीही ओठ माझे बंद का?
मिटुनी ओठ कुठवर मी मूक अता राहू?
का उघड्या डोळ्यांनी सर्वनाश पाहू?
तू माझे रक्त आणि तूच प्राण माझा
प्राणांहुन प्रिय मजला तूच बाळ माझा
नाकारित माझे मज कोठवरी राहू?
का उघड्या डोळ्यांनी सर्वनाश पाहू?
या जगात वार्यावर सोडिले तुला मी
स्नेहशून्य जीवन हा वारसा दिला मी
रात्रंदिन सलत व्यथा सांग कशी साहू?
का उघड्या डोळ्यांनी सर्वनाश पाहू?
गीत – शान्ता शेळके
संगीत – सी. रामचंद्र
स्वर- सी. रामचंद्र
चित्रपट – घरकुल
गीत प्रकार – चित्रगीत
दशदिशांस पुसतो, पुसतो वेड्या नभा
ती कुठे राजसा माझी प्रियवल्लभा?
क्षण दिसली, लपली फिरुनी मृगलोचना
का करिसी दैवा क्रूर अशी वंचना?
ते स्वप्न संपले, स्तिमित इथे मी उभा !
मज क्षणाक्षणाला रूप तिचे भासते
छळतात जिवाला दाहक आभास ते
तिमिरांध सूर्य मी शोधित फिरतो प्रभा !
गीत – शान्ता शेळके
संगीत – पं. जितेंद्र अभिषेकी
स्वर- अरविंद पिळगांवकर
नाटक – वासवदत्ता
गीत प्रकार – नाट्यसंगीत
एक एक विरते तारा, आसमंत ये आकारा
उभा देवराया क्षितिजावरती
उठी श्रीधरा रे सरली राती
पालवीत किलबिल होई, दिगंतरा पक्षी जाई
दिशा सोनियाने अवघ्या न्हाती
उठी श्रीधरा रे सरली राती
किरण सोनियाचे माझ्या अंगणात आले
मंद मंद वाहे वारा, तुळस त्यात डोले
रंगवल्लिकेच्या रेखा, कुणी रेखिताती देखा
सुवासिनी जळभरणाते जाती
उठी श्रीधरा रे सरली राती
फुटे गाउलीला पान्हा, तिला तिचा बिलगे तान्हा
माय माउलीची ममता मोठी
उठी श्रीधरा रे सरली राती
गीत – शान्ता शेळके
संगीत – आदिल अहमद
स्वर- सुमन कल्याणपूर
चित्रपट – स्वप्न तेच लोचनी
गीत प्रकार – चित्रगीत, हे श्यामसुंदर