जगातिल धुंडुन देवस्थान
पाहिला भाकरीत भगवान
कसली भक्ती पूजाअर्चा
पुराण, पोथ्या, कीर्तन, चर्चा
रिते उदर हे असता न लगे हरिभजनाते ध्यान
माती, पाणी, उजेड, वारा
यांतुन अपुले दैव उभारा
तुम्ही आम्ही सारे मिळुनी गाऊ एकच गान
तृप्त जाहला जेथे आत्मा
तिथेच आहे तो परमात्मा
भुकेल्यास द्या अन्न राखण्या भगवंताचा मान
गीत – अण्णा जोशी
संगीत – सी. रामचंद्र
स्वर- सी. रामचंद्र
गीत प्रकार – भावगीत
कधी आम्ही गार सावली चाखितो, कधी उन्हाच्या चटकी
जगणे अमुचे नका विचारू आम्ही पाखरे भटकी
बालपणी बल करांत नव्हते
निराधार ते जीवन होते
जोवर होती आई चोचिण्या कण्या-बाजरी-मटकी
पंख पसरिता उडण्यापुरते
मग घरट्यातील जीवन सरते
चिवचिव करिता कोण ऐकतो साद आमुची लटकी?
पुरे जाहले जातो आता
शोधित फिरतो अपुला दाता
वेळेवर धावेल आमुच्या संकटांचिया घटकी
गीत – अण्णा जोशी
संगीत – अण्णा जोशी
स्वर- राणी वर्मा
गीत प्रकार – भावगीत
बघा तरी हो कशी बांधिली जमवुन काडी काडी
अशी कुणाची असेल का हो मजेदार झोपडी?
झोपडीस नाही दरवाजा आणि कडी-कोयंडा
बसायास हो कांबळ कुठली उशाला नसे धोंडा
आनंदाने तरीही मिळते विश्रांती थोडी
अशी कुणाची असेल का हो मजेदार झोपडी?
राजमहाली जाउन तिथला पाहिला पसारा
इमले माड्या हवेलीतला वेगळाच तो वारा
दुरुन साजरे दिसे परंतु त्यात नसे गोडी
अशी कुणाची असेल का हो मजेदार झोपडी?
इथे जन्म घेई जो जो तो लावी जीवा जीव
आपसांत नांदते प्रीतिची ममतेची जाणीव
दिन सौख्याचा म्हणून या इथे विधाता उजाडी
अशी कुणाची असेल का हो मजेदार झोपडी?
गीत – अण्णा जोशी
संगीत – सी. रामचंद्र
स्वर- सी. रामचंद्र
गीत प्रकार – भावगीत