तुळशीचे बनीं ।
जनी उकलिते वेणी ॥१॥
हातीं घेऊनियां लोणी ।
डोई चोळी चक्रपाणि ॥२॥
माझे जनीला नाहीं कोणी ।
ह्मणुनी देव घाली पाणी ॥३॥
जनी सांगे सर्व लोकां ।
न्हांऊं घाली माझा पिता ॥४॥
गीत – संत जनाबाई
संगीत – यशवंत देव
स्वर- आशा भोसले
गीत प्रकार – संतवाणी
जनी ह्मणे पांडुरंगा । माझ्या जीवींच्या जिवलगा ।
विनविते सांगा । महिमा साधुसंतांचा ॥१॥
कैसी वसविली पंढरी । काय महिमा भीमातीरीं ।
पुंडलिकाच्या द्वारीं । कां उभा राहिलासी ॥२॥
कैसा आला हा गोविंद । कैसा झाला वेणुनाद ।
येउनी नारद । कां राहिला ॥३॥
कृपा करा नारायणा । सांगा अंतरींच्या खुणा ।
येऊं दे करुणा । दासी जनी विनवितसे ॥४॥
गीत – संत जनाबाई
संगीत – किशोरी आमोणकर
स्वर- किशोरी आमोणकर
गीत प्रकार – संतवाणी, विठ्ठल विठ्ठल
जनी जाय पाणियासी । मागें धांवे हृषिकेशी ॥१॥
पाय भिजों नेदी हात । माथां घागरी वहात ॥२॥
पाणी रांजणांत भरी । सडासारवण करी ॥३॥
धुणें धुऊनियां आणी । ह्मणे नामयाची जनी ॥४॥
गीत – संत जनाबाई
संगीत – किशोरी आमोणकर
स्वर- किशोरी आमोणकर
गीत प्रकार – संतवाणी
दळितां कांडितां । तुज गाईन अनंता ॥१॥
न विसंबे क्षणभरी । तुझें नाम गा मुरारी ॥२॥
नित्य हाचि कारभार । मुखीं हरि निरंतर ॥३॥
मायबाप बंधुबहिणी । तूं बा सखा चक्रपाणी ॥४॥
लक्ष लागलें चरणासी । ह्मणे नामयाची दासी ॥५॥
गीत – संत जनाबाई
संगीत – सुधीर फडके
स्वर- आशा भोसले
चित्रपट – संत जनाबाई
गीत प्रकार – हे श्यामसुंदर, चित्रगीत, संतवाणी
धरिला पंढरीचा चोर । प्रेमें बांधुनियां दोर ॥१॥
हृदयी बंदिवान केला । आंत विठ्ठल कोंडला ॥२॥
शब्दें केली जडाजडी । पायीं विठ्ठलाचे बेडी ॥३॥
सोहं शब्द नाद केला । विठ्ठल काकुळती आला ॥४॥
जनी ह्मणे बा विठ्ठला । जीवें सोडीं न मी तुजला ॥५॥
गीत – संत जनाबाई
संगीत – गोविंद पोवळे
स्वर- जानकी अय्यर
गीत प्रकार – संतवाणी, विठ्ठल विठ्ठल