हरवले माझे काहीतरी
काय हरवले कसे हरवले काही कळेना परि
सहज कुणाला दुरुन पाहिले
ओठंगुन मी दूर राहिले
स्पर्शावाचून उगीच उमटला काटा अंगावरी
बघता बघता भुलले डोळे
त्या डोळ्यांतिल भाव निराळे
जागेपणी मज भूल घातली बाई कोणीतरी
लज्जा की ती होती भीती
अजुनी मज ते नसे माहिती
तिथुन परतले परि विसरले तेथे काहीतरी
गीत – ग. दि. माडगूळकर
संगीत – वसंत पवार
स्वर- आशा भोसले
चित्रपट – बाळा जो जो रे
गीत प्रकार – चित्रगीत
हले डुले हले डुले पाण्यावरी नाव
पैलतिरी असेल माझ्या राजसाचा गाव
कुठून बाई ऐकु येई पावा
उगीच कसा भास असा व्हावा
कोण दूर घुमवी सूर लागेना ग ठाव
शांत जली का हलली छाया
कोण असे भुलवितसे वाया
हळूच हसे लपुनी बसे चालवुनी भाव
कुजबुजते माझ्या मी कानी
गुणगुणते अस्फुट ही गाणी
मीच हसे मीच फसे, काय हा स्वभाव
गीत – ग. दि. माडगूळकर
संगीत – वसंत पवार
स्वर- आशा भोसले
चित्रपट – स्‍त्री जन्मा ही तुझी कहाणी
गीत प्रकार – चित्रगीत
इंद्रायणी काठी, देवाची आळंदी
लागली समाधी, ज्ञानेशाची
ज्ञानियाचा राजा भोगतो राणिव
नाचती वैष्णव, मागेपुढे
मागेपुढे दाटे ज्ञानाचा उजेड
अंगणात झाड कैवल्याचे
उजेडी राहिले उजेड होऊन
निवृत्ती, सोपान, मुक्ताबाई
गीत – ग. दि. माडगूळकर
संगीत – पु. ल. देशपांडे
स्वर- पं. भीमसेन जोशी
चित्रपट – गुळाचा गणपति
राग – भीमपलास
गीत प्रकार – भक्तीगीत, चित्रगीत
राजहंस सांगतो कीर्तीच्या तुझ्या कथा
हृदयी प्रीत जागते जाणता अजाणता
पाहिले तुला न मी तरीही नित्य पाहते
लाजुनी मनोमनी उगीच धुंद राहते
ठाउका न मजसि जरी निषद देश कोणता
दिवसरात्र ओढणी या मनास लागते
तुझीच जाहल्यापरी मी सदैव वागते
मैत्रिणीस सांगते तुझी अमोल योग्यता
निमंत्रणाविना पुन्हा हंस येई तो वनी
नादचित्र रेखितो तुझेच मंद कूजनी
वेड वाढवून तो उडून जाय मागुता
गीत – ग. दि. माडगूळकर
संगीत – सुधीर फडके
स्वर- आशा भोसले
चित्रपट – सुवासिनी
गीत प्रकार – चित्रगीत
सुवर्णमणि सोनिया ।
ये कल्लोळु जैसे पाणिया ।
तैसा मज धनंजया ।
शरण ये तूं ॥
हरिनाम सदोदित गाई रे !
नलगे साधन
नलगे जपतप
स्‍मर नित्‌ विठ्ठल-रखुमाई रे !
ज्या योगी न पावती योगबले
ज्या ज्ञानी न जाणती ज्ञानबले
वश भक्तां हरि तू होई रे !
सुखशांती हरीचे उभयचरण
स्मरता ते पुन: नच जन्‍ममरण
सुख सर्व हरीच्या पायी रे !
जो विठ्ठलनाम निज अधरी धरी
रे त्याचे मागेपुढती हरी
जो निशिदिनी सन्‍निध राही रे !
प्रभूचे पदरज- ती तर मुक्ती
भवतारक ही हरीपद-भक्ती
पथ ह्याविण सोपा नाही रे !
गीत – ग. दि. माडगूळकर
संगीत – सुधीर फडके
स्वर- बबनराव नावडीकर
चित्रपट – विठ्ठल रखुमाई
गीत प्रकार – चित्रगीत, विठ्ठल विठ्ठल
हरी तुझी कळली चतुराई
हरी रे, भुलायची मी नाही
गायीमागं गोप दवडुनी
लाखांमधली एक निवडुनी
आडरानी या मला अडवुनी, दाविसी धिटाई
गरीब भोळ्या जरी गवळणी
खोडी काढता होऊ नागिणी
बळेच घेसी निंदा ओढुनी, काय रे तर्‍हा ही
मी न एकटी इथे मोहना
जिवंत पुढती वाहे यमुना
धावुन येईल माझ्या वचना, हिरवी वनराई
गीत – ग. दि. माडगूळकर
संगीत – सुधीर फडके
स्वर- आशा भोसले
चित्रपट – जशास तसें
गीत प्रकार – चित्रगीत, हे श्यामसुंदर
जग हे बंदिशाला
कुणी न येथे भलाचांगला, जो तो पथ चुकलेला
ज्याची त्याला प्यार कोठडी
कोठडीतले सखे सौंगडी
हातकडी की अवजड बेडी, प्रिय हो ज्याची त्याला
जो तो अपुल्या जागी जखडे
नजर न धावे तटापलीकडे
उंबरातले किडेमकोडे उंबरि करिती लीला
कुणा न माहीत सजा किती ते
कोठुन आलो ते नच स्मरते
सुटकेलागी मन घाबरते, जो आला तो रमला
गीत – ग. दि. माडगूळकर
संगीत – सुधीर फडके
स्वर- सुधीर फडके
चित्रपट – जगाच्या पाठीवर
राग – मिश्र मांड
गीत प्रकार – चित्रगीत
इवल्याइवल्याशा
टिकल्याटिकल्यांचे
देवाचे घर बाई उंचावरी
ऐक मजा तर ऐक खरी !
निळीनिळी वाट
निळेनिळे घाट
निळ्यानिळ्या पाण्याचे झुळुझुळु पाट
निळ्यानिळ्या डोंगरांत निळीनिळी दरी !
ऐक मजा तर ऐक खरी !
चांदीच्या झाडांना सोन्याची पाने
सोनेरी मैनेचे सोनेरी गाणे
सोन्याची केळी, सोन्याचा पेरू
सोनेरी अंब्याला सोन्याची कैरी !
ऐक मजा तर ऐक खरी !
देवाच्या घरात गुलाबाची लादी
मऊमऊ ढगांची अंथरली गादी
चांदण्याची हंडी, चांदण्याची भांडी
चांदोबाचा दिवा मोठा लावला वरी !
ऐक मजा तर ऐक खरी !
गीत – ग. दि. माडगूळकर
संगीत – पु. ल. देशपांडे
स्वर- आशा भोसले
चित्रपट – देवबाप्पा
गीत प्रकार – बालगीत, चित्रगीत
इवल्याइवल्या वाळूचं
हे तर घरकुल बाळूचं
बाळू होता बोटभर
झोप घेई पोटभर
वरती बाळू
खाली वाळू
बाळू म्हणे की, “इथेच लोळू”
उन्हात तापू लागे वाळू
बाळूला ती लागे पोळू
या इवल्याशा खोपेत
बाळू रडला झोपेत !
एक वन होतं वेळूचं
त्यात घर होतं साळूचं
साळू मोठी मायाळू
वेळू लागे आंदोळू
त्या पंख्याच्या वार्‍यात
बाळू निजला तोर्‍यात !
एकदा पाऊस लागे वोळू
भिजली वाळू, भिजले वेळू
नदीला येऊ लागे पूर
बाळू आपला डाराडूर
भुर्रकन्‌ खाली आली साळू
आणि म्हणाली, “उठ रे बाळू”
बाळू निजला जैसा धोंडा
तोवर आला मोठा लोंढा
साळूनं मग केलं काय?
चोचीत धरला त्याचा पाय
वेळूवरती नेले उंच
आणि मांडला नवा प्रपंच
बाळूचं घरकुल वाहून गेलं
साळूचं घरटं राहून गेलं !
साळू आहे मायाळू
बाळू बेटा झोपाळू
वाळू आणि वेळूवर
ताणून देतो खालीवर
साळू म्हणते, “गाऊ, खेळू”
बाळू म्हणतो, “इथंच लोळू.”
आमची गोष्ट आखुड
संभ्याच्या पाठीत लाकूड
गीत – ग. दि. माडगूळकर
संगीत – सुधीर फडके
स्वर- सुधीर फडके
चित्रपट – प्रपंच
गीत प्रकार – बालगीत, चित्रगीत
चला जाउ द्या पुढे काफिला
अजुनी नाही मार्ग संपला
इथेच टाका तंबू !
जाता जाता जरा विसावा
एक रात्र थांबू
इथेच टाका तंबू !
थोडी हिरवळ, थोडे पाणी
मस्त त्यात ही रात चांदणी
उतरा ओझी, विसरा थकवा
सुखास पळभर चुंबू
इथेच टाका तंबू !
अंग शहारे जशी खंजिरी
चांदही हलला, हलल्या खजुरी
हलल्या तारा हलला वारा
नृत्य लागले रंगू
इथेच टाका तंबू !
निवल्या वाळूवरी सावली
मदमस्तानी नाचु लागली
लयीत डुलती थकली शरिरे
नयन लागले झिंगू
इथेच टाका तंबू !
गीत – ग. दि. माडगूळकर
संगीत – पु. ल. देशपांडे
स्वर- आशा भोसले, पं. वसंतराव देशपांडे
चित्रपट – गुळाचा गणपति
गीत प्रकार – चित्रगीत, युगुलगीत
झाला महार पंढरीनाथ
काय देवाची सांगू मात?
नेसला मळिण चिंधोटी
घेतली हातामधी काठी
घोंगडी टाकिली पाठी
करी जोहार दरबारात !
मुंडाशात बांधिली चिठी
फेकतो दुरुन जगजेठी
‘दामाजीनं विकली जी कोठी-
त्याचं घ्यावं दाम पदरात !’
खळखळा ओतिल्या मोहरा
‘घ्या जी मोजून, पावती करा’
ढीग बघून चमकल्या नजरा
शहा घाली बोट तोंडात !
गीत – ग. दि. माडगूळकर
संगीत – सुधीर फडके
स्वर- सुधीर फडके
चित्रपट – पुढचं पाऊल (१९५०)
राग – काफी
गीत प्रकार – चित्रगीत, विठ्ठल विठ्ठल
ओळखणार ना बरोबर, ओळखा हं !
झाडावरती घडे लटकले, घड्यात होते पाणी
त्या पाण्याच्या वड्या कापूनी कुरुकुरु खातो कोणी
आता सांगा खिरापत, माझी सांगा खिरापत – खोबरं
अफगाणातील इजार भारी त्याच्या हाती मोती
त्या मोत्यांना उन्हात सुकवून पोरेबाळे खाती
आता सांगा खिरापत, माझी सांगा खिरापत – मनुका
कोकणातला पिवळा बाळू फार लागला माजू
पकडून आणा भट्टीवरती काळिज त्याचे भाजू – काजू
तालमीतला पोर मारतो तिठ्ठयावरती थापा
सुरकुतलेली बोटे त्यांचा गोड लागतो पापा
आता सांगा खिरापत, माझी सांगा खिरापत – खारका
आधी होतीस काळीपिवळी नंतर झालीस गोरी ग
देवळातुनी का ग फिरती वेणूगावच्या पोरी
आता सांगा खिरापत, माझी सांगा खिरापत – खडीसाखर
चट्टामट्टा बाळंभट्टा, आता मागील त्याला रट्टा
पंजा चाटीत निजेल गुपचूप तो वाघाचा पठ्ठा
आता झाली खिरापत
गीत – ग. दि. माडगूळकर
संगीत – सुधीर फडके
स्वर- सुधीर फडके
चित्रपट – चिमण्यांची शाळा
गीत प्रकार – बालगीत, चित्रगीत
झडल्या भेरी झडतो डंका
पुढचे पाऊल पुढेच टाका
तोंड लागले आज लढ्याला
चहुबाजूंनी येईल घाला
छातीवरती शस्त्रे झेला
फिरू नका रे डरू नका, डरू नका
शपथ तुम्हाला शिवरायाची
मराठमोळ्या मर्दुमकीची
समर्थ गुरु केसरी टिळकांची
विजयाच्या या ऐका हाका, ऐका हाका
निशाण अपुले उंच धरा
शूरपणाची शर्थ करा
कराच किंवा रणी मरा
बहाद्दरांनो मरणा जिंका, मरणा जिंका
गीत – ग. दि. माडगूळकर
संगीत – सुधीर फडके
स्वर- मालती पांडे, सुधीर फडके
चित्रपट – वंदे मातरम्‌
गीत प्रकार – चित्रगीत, स्फूर्ती गीत
जन्मच हा तुजसाठी, प्रिया रे
नव्हत्या माहीत मज वेडीला जन्मांतरीच्या गाठी
मनात आला विनोद केवळ
बोलून गेले काही अवखळ
ओठी होती अल्लड बोली, आपुलकी पोटी
चुरगळली मी हिरवी पाने
सहजपणाने, अज्ञानाने
आज उमटली लालस मेंदी तळहाती, बोटी
परिहासाची विसर बोलणी
आठव होते काय लोचनी
परिचय झाला प्रणयासाठी, परिणय शुभ शेवटी
गीत – ग. दि. माडगूळकर
संगीत – सुधीर फडके
स्वर- आशा भोसले
चित्रपट – गरिबाघरची लेक
गीत प्रकार – चित्रगीत
झुक झुक झुक झुक अगीनगाडी
धुरांच्या रेघा हवेत काढी
पळती झाडे पाहूया
मामाच्या गावाला जाऊया
मामाचा गाव मोठा
सोन्याचांदीच्या पेठा
शोभा पाहुन घेऊया
मामाची बायको गोरटी
म्हणेल कुठली पोरटी
भाच्यांची नावे सांगूया
मामाची बायको सुगरण
रोज रोज पोळी शिकरण
गुलाबजामन खाऊया
मामा मोठा तालेवार
रेशीम घेईल हजार वार
कोट विजारी लेऊया
गीत – ग. दि. माडगूळकर
संगीत – वसंत पवार
स्वर- आशा भोसले
चित्रपट – तू सुखी रहा
राग – भैरवी
गीत प्रकार – बालगीत, चित्रगीत
झटकून टाक जीवा दुबळेपणा मनाचा
फुलला पहा सभोवती आनंद जीवनाचा
होईल ताप काही मध्यान्हीच्या उन्हाचा
अविचार सोड असला कोल्हाळ कल्पनांचा
आस्वाद घे सुखाने येत्या नव्या क्षणाचा
पुष्पास वाटते का भय ऊनपावसाचे
आयुष्य त्यास आहे एकाच ना दिसाचे
हसुनी करी परि ते वर्षाव सौरभाचा
का कालचा उद्याला देसी उगा हवाला
द्यावाच वाटतो ना मग जीव दे जिवाला
अव्हेर काय करिसी अनमोल या तनाचा
गीत – ग. दि. माडगूळकर
संगीत – एन्‌. दत्ता
स्वर- महेंद्र कपूर
चित्रपट – मधुचंद्र
गीत प्रकार – चित्रगीत
झरा प्रीतीचा का असा आटतो रे?
कशी काय बोलू गळा दाटतो रे !
तुझे लग्‍न झाले असे ऐकले मी
तुझे नाव तेव्हा दुरी टाकले मी
जिव्हाळा पुन्हा का तुझा वाटतो रे !
मिळे सागरासा पती त्या सतीला
मुळी डाग नाही तुझ्या इज्जतीला
उरी जाळ माझ्या उगा पेटतो रे !
जळे जीव जैसी वडी कापराची
अपेशी जिण्याला कळा ये धुराची
इमानास धोका कसा भेटतो रे !
गीत – ग. दि. माडगूळकर
संगीत – वसंत पवार
स्वर- सुमन कल्याणपूर
चित्रपट – मल्हारी मार्तंड
गीत प्रकार – चित्रगीत
झाली ग बरसात, फुलांची झाली ग बरसात
वसंतवेड्या लहरी भरल्या उसळत सर्वांगात
मुक्या मनाला फुटली वाणी
मनोगतांची झाली गाणी
पालवल्या ग आशावेली न्हाल्या नवरंगांत
धुंद सुखाचा सुटला दरवळ
अंगच अवघे झाले परिमळ
दंवासारखे आनंदासू कुसुमांसम नयनांत
तळहातीच्या भाकितरेखा
जित्या जुईच्या झाल्या शाखा
दिसेल तेथे प्रफुल्ल झाले फुलल्या उल्हासात
गीत – ग. दि. माडगूळकर
संगीत – वसंत पवार
स्वर- आशा भोसले
चित्रपट – वरदक्षिणा
गीत प्रकार – चित्रगीत
दिली कोंबड्याने बांग
विझे चांदण्याची रांग
ये जाग पाखरांना, तो ऐक किलबिलाट
झाली भली पहाट !
मुक्या लेकरांची माय
हंबरते माझी गाय
घे ओढ वासरू ते, रुतली गळ्यात गाठ
पुरे लेकराची आस
झरे माउलीची कांस
त्या झेलताच धारा आला भरून माठ
लागे दुडुदुडु करू
खुळे शेळीचे कोकरू
येताच माय चाटु ते थांबले मुकाट
अंगे झिंझाडून सैल
उभे ठाकले रे बैल
गवतात झोपलेली न्हाली दंवात वाट !
गीत – ग. दि. माडगूळकर
संगीत – वसंत पवार
स्वर- आशा भोसले
चित्रपट – सांगत्ये ऐका
गीत प्रकार – चित्रगीत
मिटून घेतले नेत्र तरी ते चित्र मनाला दिसे
झाले ग बाई संसाराचे हसे
मी वाट पाहते बसुनी तुमची घरी
तुम्ही रात जागता भलतीच्या मंदिरी
पडणेच कपाळी चुकल्यावर पायरी
तोल सोडुनी तुम्ही वागता, तुम्हा सावरू कसे?
झाले ग बाई संसाराचे हसे
कुणी म्हणे तुम्हाला शुद्धच नसते कधी
तीजसवे जेवता एका ताटामधी
कोठून शोधु या रोगावर औषधी
जीभा जगाच्या कानी ओतती जसे तापले शिसे
झाले ग बाई संसाराचे हसे
भाळला नाथ हो सौख्याला कोणच्या
तुम्ही मांजर झाला ताटाखाली तीच्या
संपल्या कथा आता नीतीच्या प्रीतीच्या
नीतीहीनाची अनाथ बाईल, कोण तीयेला पुसे
झाले ग बाई संसाराचे हसे
गीत – ग. दि. माडगूळकर
संगीत – सुधीर फडके
स्वर- ललिता फडके
चित्रपट – उमज पडेल तर
गीत प्रकार – चित्रगीत