कधी रिमझिम झरणारा आला ऋतू आला
कधी टपोर्या थेंबांचा आला ऋतू आला
कधी पुलकित हर्षाचा, हळव्या क्षण स्पर्शाचा
आला ऋतू आला
पानावर थिरकत नाचे पाणी
मनामध्ये झुलतात गाणी दिवाणी
साद गंधातुनी, ओल्या मातीतुनी, आला ऋतू आला
अंग अंग स्पर्शताती मोती रुपेरी
आठवे ती अनावर भेट अधुरी
मन चिंब ओले, शहारत बोले, आला ऋतू आला
हा पाऊस वागे तुझ्यासारखा
हा येतो नि जातो तुझ्यासारखा
ऊन-पावसाचा, खेळ श्रावणाचा, आला ऋतू आला
गीत – नितीन आखवे
संगीत – श्रीधर फडके
स्वर- सुरेश वाडकर
गीत प्रकार – ऋतू बरवा, भावगीत
फुलले रे क्षण माझे, फुलले रे
मेंदीने शकुनाच्या, शकुनाच्या मेंदीने
सजले रे क्षण माझे, सजले रे
झुळूक वार्याची आली रे लेऊन कोवळी सोनफुले
साजण स्पर्शाची जाणीव होऊन भाळले मन खुळे
या वेडाचे नाचरे भाव बिलोरे
मेंदीने, शकुनाच्या मेंदीने,
खुलले रे क्षण माझे, खुलले रे
ओढ ही बेबंद श्वासात ध्यासात, स्वप्नात येणे तुझे
भांबावल्या माझ्या ऊरात स्पर्शात, रेशीम काटे तुझे
मनमोराचे जादुभरे हे पिसारे
मेंदीने, शकुनाच्या मेंदीने,
हसले रे क्षण माझे, हसले रे
रीत ही, प्रीत ही उमजेना
जडला का जीव हा समजेना
कशी सांगू मी, कशी सांगू मी
माझ्या मनीची कथा रे
मेंदीने, शकुनाच्या मेंदीने,
भुलले रे क्षण माझे, भुलले रे
गीत – नितीन आखवे
संगीत – श्रीधर फडके
स्वर- आशा भोसले
राग – पहाडी
गीत प्रकार – भावगीत
एक वेस ओलांडली गाव एक दूर राहिले
एकट्याच वाटेस या दिशांनीच सांभाळले
इथेच मधेच क्षणैक उगाच का मी थांबलो
सावलीत माझिया एकटा विसावलो
पुन्हा उन्हात चाललो
एक वेस ओलांडली, गाव एक दूर चालले
उसासे फुलांचे खुलासे सणांचे का मी ऐकतो
मातीच्या उरातल्या स्पंदनात गुंगतो
पुन्हा मनात भंगतो
पावलास स्पर्श सांगतो गाव दूरदूर थांबले
एक वेस ओलांडली
संपल्या जुन्या खुणा जरी नवा ठसा दिसे
प्रवासी पुन्हा हाच खेळ संचिती असे
एक वेस ओलांडता गाव नवे दिसू लागले
एकट्याच वाटेस या दिशांनीच सांभाळले
गीत – नितीन आखवे
संगीत – श्रीधर फडके
स्वर- श्रीधर फडके
गीत प्रकार – भावगीत