फार नको वाकू
जरी उंच बांधा
फार नको झाकू
तुझा गौर खांदा
आणि गडे डोळे
तुझे फार फंदी
साज तुझा आहे
जुईचा सुगंधी
चित्त मऊ माझं
जशी रानकळी
धुंद तुझी आहे
नदी पावसाळी
श्वास तुझे माझे
जसा रानवारा
प्रीत तुझीमाझी
जसा सांजतारा
गीत – ना. घ. देशपांडे
संगीत – जी. एन्‌. जोशी
स्वर- जी. एन्‌. जोशी
गीत प्रकार – भावगीत
अंतरीच्या गूढ गर्भीं एकदा जें वाटलें !
एकदा जें वाटलें तें प्रेम आता आटलें !
दूर सोनेरी सुखाचे पाहिले आभास मीं, तू :
रंगलें आभाळ पूर्वी : तेंच आता फाटलें !
एकदा ज्यांतून मागे सूर संवादी निघाले
वंचनेने तोडले ते स्‍नेहतंतू आंतले !
शेवटी मंदावलेल्या वादळी वार्‍याप्रमाणे
राहणें झालें दिवाणें, गीत गाणें कोठलें !
गीत – ना. घ. देशपांडे
संगीत – राम फाटक
स्वराविष्कार- ∙ सुधीर फडके∙ जी. एन्‌. जोशी( गायकांची नावे कुठल्याही विशिष्ट क्रमाने दिलेली नाहीत. )
गीत प्रकार – भावगीत, कविता
टीप – • काव्य रचना- १९३४.• स्वर- सुधीर फडके, संगीत- राम फाटक.• स्वर- जी. एन्‌. जोशी, संगीत- जी. एन्‌. जोशी.
सात जन्मांची निनावी आशा धरून मनात
बकुळफुला कधीची तुला धुंडते बनात
टाकून दूर नदीच्या पार
उघडे माझ्या घराचे दार
सदैव पीशी हिंडते अशी नि:संगपणात
टाकून सारा शृंगारसाज
तुझ्याचसाठी फिरते आज
होईल कसे? झाले रे हसे सगळ्या जनांत !
श्रावणघनगर्जन वाजे
दिपव दोन्ही नयन माझे
एका आंधळ्या गहन निळ्या सोनेरी क्षणांत
गीत – ना. घ. देशपांडे
संगीत – यशवंत देव
स्वर- मंगला नाथ
गीत प्रकार – भावगीत
डाव मांडून भांडून मोडू नको
डाव मोडू नको
आणले तू तुझे सर्व, मी आणले
सर्व काही मनासारखे मांडले
तूच सारे तुझे दूर ओढू नको
सोडले मी तुझ्याभोवती सर्व गे
चंद्रज्योतीरसाचे रुपेरी फुगे
फुंकरीने फुगा, हाय, फोडू नको
‘गोकुळीचा सखा’ तूच केले मला
कौतुकाने मला हार तू घातला
हार हासून घालून तोडू नको
काढले मी तुझे नाव, तू देखिले
आणि माझे पुढे नाव तू रेखिले
तूच वाचून, लाजून, खोडू नको
गीत – ना. घ. देशपांडे
संगीत – राम फाटक
स्वर- सुधीर फडके
राग – पहाडी
गीत प्रकार – भावगीत