हृदय हासले मी गुणगुणले
जागेपणी मी स्वप्न पाहिले
सांजसमयी एका प्रहरी
तू आलास मज सामोरी
दृष्टी बावरी वृत्ती हासरी
पाहुनी मन भुलले, लाजले
भेट आपुली क्षणभराची
वाटे मजसी युगायुगांची
ओढ लागते तव प्रीतिची
तुझ्यासवे रमले, रंगले
गीत – हिराकांत कलगुटकर
संगीत – अविनाश व्यास
स्वर- आशा भोसले
चित्रपट – नंदादीप
गीत प्रकार – चित्रगीत, कल्पनेचा कुंचला
आज अचानक दिसले नयनी
बहरलेले नंदनवन अंगणी
सपर्ण तरूवर गाई कोकिळ
ऋतु वसंताची ही चाहूल
नकळत कोठून पावा मंजूळ गुणगुणतो कानी
वसंतराणी थयथय नाचते
सप्त सुरांतून लकेर घुमते
रोमांचाने पुलकित होते अंगअंग ह्या क्षणी
पानोपानी फुलाफुलावर
नवरसगंधाचा हा बहर
अनेक झुंबर आम्रतरूवर लावियले कोणी
गीत – हिराकांत कलगुटकर
संगीत – अविनाश व्यास
स्वर- आशा भोसले
चित्रपट – नंदादीप
गीत प्रकार – चित्रगीत, नयनांच्या कोंदणी