खुदकन गाली हंसले
मी जाणुनबुजुन फसले
जातांयेतां हंसुनी बघता वाट रोखिता
मिचकावून डोळे
सहज थांबला वेध घेतला तीर मारिला
जखमी मजला केले
मी व्याकुळले वेडी झाले तरिही हंसले
अघटित हें घडलें
खेळ खेळला जीव गुंतला, निघुनी गेला
काय तुम्हां रुचलें
गीत – मा. ग. पातकर
संगीत – गजानन वाटवे
स्वर- मोहनतारा अजिंक्य
गीत प्रकार – भावगीत
जाणार आज मी माहेराला
ओटी भरा ग ओटी भरा,
माझी ओटी भरा
हिरवि चोळी शालु हिरवा
हाती भरला हिरवा चुडा
हिरवा मरवा वेणींत घाला,
माझ्या वेणींत घाला
हिरव्या वेली हिरव्या रानीं
मधें मी बसले हिरवी राणी
हिरवा चौरंग बसायला,
मला बसायला
माझी मला जड झाली पाऊले
डोळ्याभवती काळी वर्तुळें
आशीर्वाद तुम्हि द्या ग मला,
तुझी द्या ग मला
हंसू नका ग गुपित सांगते
आज जरी मी एकलि जाते
आणिन संगे युवराजाला,
माझ्या युवराजाला
गीत – मा. ग. पातकर
संगीत – गजानन वाटवे
स्वर- मोहनतारा अजिंक्य
गीत प्रकार – भावगीत
त्रिभुवनपालक रघुवीर तो स्वामि अयोध्येचा
वनवासी तुम्हीं आज पोरके पिता असुन तुमचा
कुणी रजकानें मला निंदिले सहजी गमतीत
अग्निशुद्ध मी असुन त्यागिले मजला रानांत
गर्भवती मी केवळ जगले विचार येता तुमचा
तुम्हां मुखीचे हास्य पाहुनी विसरलेहि दु:ख
बोल बोबडे ऐकुन वाटे स्वर्गीचे सौख्य
पतीपारख्या स्त्रीला केवळ अधार पुत्रांचा
घ्या बाळांनो शिकून विद्या आणि धनुर्वेद
राज्य पृथ्विचे जिंका देते आई आशीर्वाद
आशीर्वाद कधि होइ न खोटा सती जानकीचा
गीत – मा. ग. पातकर
संगीत – गजानन वाटवे
स्वर- गजानन वाटवे
गीत प्रकार – राम निरंजन, भावगीत
अंतरीच्या अपुर्या आशा
आकारून कधी येतिल का?
सांग माझ्या मानसीची
भावफुले फुलतील का?
प्रकाश सरला जीवनाचा
दिव्य किरण तव प्रीतीचा
मार्ग माझ्या जीवनाचा
कधी सख्या उजळेल का?
काय जादू केली नकळे
वेड जिवाला तुझे लागले
भिन्न अपुली दोन हृदये
एकरूप कधी होतिल का?
गीत – मा. ग. पातकर
संगीत – गजानन वाटवे
स्वर- भानुमती कंस
गीत प्रकार – भावगीत