क्षणीं या दुभंगुनिया घेई कुशीत माते
अश्राप भूमिकन्या तुज आज आळविते
मम अग्निदिव्य गाथा त्रैलोक्य गात असता
शंका जनी पुन्हा का? का त्याग भाळी होता?
नुसतीच वंचना ही, हे न्यायदान खोटे
पोटी रघुकुलांकुर जपण्यास प्राण धरिले
प्रतिराम करुनी बाळा कर्तव्यपार झाले
पुत्रास तात मिळती परि मी अनाथ उरते
वच, देह अन् मनाने पतिनिष्ठताच जपली
ध्यानी तशीच स्वप्नी वैदेही राम स्मरली
पतिधर्म ब्रीद माझे लावूनिया पणा ते
गीत – यशोदकुमार गवळणकर
संगीत – दशरथ पुजारी
स्वर- सुमन कल्याणपूर
गीत प्रकार – भावगीत
कृष्णगाथा एक गाणे जाणते ही वैखरी
एकतारी सूर जाणी श्रीहरी जय श्रीहरी
तू सखा तू पाठिराखा तूच माझा ईश्वर
राहिलासी व्यापुनीया तूच माझे अंतर
आळविते नाम ज्याला अमृताची माधुरी
पाहते मी सर्व ते ते कृष्णरूपी भासते
आणि स्वप्नी माधवाच्या संगती मी नाचते
ध्यानरंगी रंगताना ऐकते मी बासरी
तारिलेसी तू कन्हैया दीनवाणे बापुडे
हीन मीरा त्याहूनीही, भाव भोळेभाबडे
दे सहारा दे निवारा या भवाच्या संगरी
गीत – यशोदकुमार गवळणकर
संगीत – दशरथ पुजारी
स्वर- सुमन कल्याणपूर
गीत प्रकार – हे श्यामसुंदर, भावगीत