झुळझुळे नदी ही बाई
देहलतेला शीतल करुनी आनंदाने गाई
पानफुलांनी तरुवर फुलती
पाण्यावरती तरंग झुलती
सुरेल मुरलीनादे घुमते ती अंब्याची राई
सुखात का ग खुपते काही?
श्याम सावळा भेटत नाही
राधेला का छळिती गोपी, कळत कसे ग नाही
या पाण्यावर हृदय उमलते
हृदयातुनी का गुपित उकलते
नको गुपित ते उकलाया ग, अबोलीच मी राही
गीत – कवी संजीव
संगीत – दत्ता डावजेकर
स्वर- उषा मंगेशकर, मीना खडीकर
चित्रपट – थोरातांची कमळा
गीत प्रकार – चित्रगीत
कधी शिवराय यायचे तरी
दिवाळी दसरा मिळुनी सोहळा आता व्हायचा घरी
सडा केशरी शिंपिन दारी
रांगोळी घालीन किनारी
गरिबाचे घर जाईल उजळून राजमंदिरापरी
छत्रपतीच्या सरदाराशी
मराठमोळ्या दिलदाराशी
ठरले माझे लगीन, पडतील तांदूळ डोईवरी
मिळता आशीर्वाद तयांचा
साक्षात्कारच चैतन्याचा
मीच नव्हे उठतात शिरा या अमृत प्याल्यापरी
गीत – कवी संजीव
संगीत – दत्ता डावजेकर
स्वर- उषा मंगेशकर
चित्रपट – थोरातांची कमळा
गीत प्रकार – चित्रगीत, प्रभो शिवाजीराजा
खुलविते मेंदी माझा रंग गोरापान हो रंग गोरापान
गोरागोरापान जसं केवड्याचं रान बाई ग केवड्याचं रान
दोन डोळे नंदादीप, पेटले हे आपोआप
काजळली पापण्यांची बदामी कमान
नीलमणी नयनांत, हिरकण्यांचे हो दात
ओठ लाललाल माझे माणकांसमान
नवी लाज लाजते मी, नवा साज साजते मी
लाजर्या मनाला माझ्या करा बंदिवान
गीत – कवी संजीव
संगीत – वसंतकुमार मोहिते
स्वर- आशा भोसले
चित्रपट – भाऊबीज
राग – भैरवी
गीत प्रकार – चित्रगीत, लावणी
पडला पदर खांदा तुझा दिसतो ग
कमरेला कमरपट्टा कसतो ग बाई कसतो
काळ्या कुरळ्या वेणीत मरवा
जरतारी शालू हिरवा
गोर्या दंडात बाजूबंद खुलतो
सफरचंदाची गाली गुलाली
फुटलं डाळींब ओठांच्याखाली
राघू नाकाचा नुसताच रुसतो
तुझ्या तरुणपणाला ग धार
मार भिवईंची काळी कट्यार
घाव वर्मावरी असा बसतो
गीत – कवी संजीव
संगीत – वसंतकुमार मोहिते
स्वर- आशा भोसले
चित्रपट – भाऊबीज
गीत प्रकार – चित्रगीत, लावणी
अखेरचा हा तुला दंडवत
सोडून जाते गाव
दरीदरींतून मावळदेवा
देऊळ सोडून धाव
तुझ्या शिवारी जगले हसले
कडीकपारी अमृत प्याले
आता हे परि सारे सरले
उरलं मागं नाव
हाय सोडूनी जाते आता
ओढून नेली जैसी सीता
कुणी न उरला वाली आता
धरती दे ग ठाव
गीत – कवी संजीव
संगीत – आनंदघन
स्वर- लता मंगेशकर
चित्रपट – मराठा तितुका मेळवावा
गीत प्रकार – चित्रगीत
टीप – • प्रतिध्वनी- उषा मंगेशकर, मीना खडीकर.