झिणिझिणि वाजे बीन
सख्या रे, अनुदिन चीज नवीन
कधिं अर्थाविण सुभग तराणा
कधिं मंत्रांचा भास दिवाणा
सूर सुना कधिं केविलवाणा
शरणागत अतिलीन
कधिं खटका, कधिं रुसवा लटका
छेडी कधिं प्राणांतिक घटका
कधिं जिवाचा तोडुन लचका
घेतें फिरत कठीण
सौभाग्यें या सुरांत तारा
त्यांतुन अचपळ खेळे पारा
अलख निरंजन वाजविणारा
सहजपणांत प्रवीण
गीत – बा. भ. बोरकर
संगीत – श्रीधर फडके
स्वर- आशा भोसले
गीत प्रकार – भावगीत
टीप – • काव्य रचना- ७ मार्च १९४३.
गडद निळे गडद निळे जलद भरुनि आले
शीतलतनु चपलचरण अनिलगण निघाले
क्षितिजीं आलें भरतें ग
घनांत कुंकुंम खिरतें ग
झालें अंबर
झुलतें झुंबर
हवेंत अत्तर तरतें ग
लाजण झाली धरती ग
साजण कांठावरतीं ग
उन्हांत पान
मनांत गान
ओलावुन थरथरतें ग
नातें अपुलें न्हातें ग
हो‍उनि ऋतुरस गातें ग
तृणांत मोती
जळांत ज्योती
लावित आलें परतें ग.
सरिंवर सरी आल्या ग
सचैल गोपी न्हाल्या ग.
गीत – बा. भ. बोरकर
संगीत – श्रीधर फडके
स्वर- पद्मजा फेणाणी-जोगळेकर
गीत प्रकार – ऋतू बरवा, भावगीत
टीप – • काव्य रचना- ४ ऑक्‍टोबर १९५९.
तापल्या आहेत तारा तोंवरी गाऊन घे
स्वप्‍न आहे लोचनीं हें तोंवरी पाहून घे
रे फुलांचा बाण आहे, अमृताची वेदना
नी सुखाच्या आंत आहे शापणारी यातना
त्राण आहे तोंवरी सप्राण हें साहून घे
आग आहे लागलेली अंतरींच्या मोहळा
आणि आकाशांत आहे आसवांचा सोहळा
चालल्या आहेत धारा तोंवरी न्हाऊन घे
वादळीं अंधारल्या पाण्यांतुनी तेजाळुनी
कामिनी आवेगवेडी येत आहे दामिनी
जाग आहे तोंवरी रे दीप हा लावून घे
गीत – बा. भ. बोरकर
संगीत – प्रभाकर पंडित
स्वराविष्कार- ∙ सुरेश वाडकर∙ सुधीर फडके( गायकांची नावे कुठल्याही विशिष्ट क्रमाने दिलेली नाहीत. )
गीत प्रकार – भावगीत, कल्‍पनेचा कुंचला
टीप – • काव्य रचना- १५ सप्‍टेंबर १९५८.• स्वर- सुरेश वाडकर, संगीत- प्रभाकर पंडित.• स्वर- सुधीर फडके, संगीत- ???.
तव नयनाचें दल हललें ग !
पानावरच्या दंवबिंदूपरि
त्रिभुवन हें डळमळलें ग !
तारे गळले, वारे ढळले
दिग्गज पंचाननसे वळले
गिरि ढांसळले, सुर कोसळले
ऋषि, मुनि, योगी चळले ग !
ऋतुचक्राचे आंस उडाले
आभाळातुन शब्द निघाले,
“आवर आवर अपुले भाले
मीन जळीं तळमळले ग !”
हृदयीं माझ्या चकमक झडली
नजर तुझी धरणीला भिडली
दो हृदयांची किमया घडली
पुनरपि जग सावरलें ग !
गीत – बा. भ. बोरकर
संगीत – सलील कुलकर्णी
स्वर- सलील कुलकर्णी
अल्बम – संधीप्रकाशात
गीत प्रकार – भावगीत, नयनांच्या कोंदणी
टीप – • काव्य रचना- २८ नोव्हेंबर १९४७.
चढवूं गगनिं निशाण । अमुचें
चढवूं गगनिं निशाण
कोटि मुखांनी गर्जूं जय जय स्वतंत्र हिंदुस्‍तान
निशाण अमुचें मनःक्रांतिचें
समतेचें अन्‌ विश्वशांतिचें
स्वस्तिचिन्ह हें युगायुगांचें ऋषिमुख-तेज महान्‌
मूठ न सोडूं जरि तुटला कर
गाऊं फासहि आवळला जर
ठेवूं निर्भय ताठ मान ही झालें जरि शिर्काण
साहूं शस्त्रास्त्रांचा पाऊस
आम्ही प्रह्लादाचे वारस
सत्य विदारक आणूं भूवर दुभंगून पाषाण
विराटशक्ती आम्ही वामन
वाण आमुचें दलितोद्धारण
नमवूं बळिचा किरीट उद्धट ठेवुनि पादत्राण
हिमालयासम अमुचा नेता
अजातशत्रू आत्मविजेता
नामें त्याच्या मृत्युंजय हें चढवूं वरति निशाण
गीत – बा. भ. बोरकर
संगीत –
स्वर-
गीत प्रकार – स्फूर्ती गीत
डोळे तुझे बदामी, देती मला सलामी
त्यानेच हा असा मी झालो गडे निकामी
लागे न चित्त कामीं, लागे न चित्त धामीं
बोली मिठास त्यांची, कावा तरी गनीमी
छळिती परोपरींनी डोळे तुझे बदामी
सुल्तान मोंगली हे डोळे तुझे बदामी
मोठे लबाड लुच्चे डोळे तुझे बदामी
भुलवून मारणारे डोळे तुझे बदामी
होती क्षणांत भोळे, होती क्षणीं वहीमी
जखमी करून जीवा हसती वरून नामी
मी धुंद मोर कामी, फुलवून रोमरोमीं
हे नाटकी इमानी डोळे तुझे बदामी
गीत – बा. भ. बोरकर
संगीत –
स्वर- पंडितराव नगरकर
गीत प्रकार – भावगीत