छेडून गेले मधुर स्वर विमल
आज उपवनी कोण पाहिले
प्राणांचे ऋतुगंध उमलुनी
जीवन संगीत त्यास वाहिले
मदिर रात्र ही अधीर चंद्रिका
गात्रामधुनी हसे राधिका
डोळे टिपले पानांचेही
पहाट होता दहिवर ओले
कंठामधुनी सूर झुलावा
सुरांत तुझिया जीव फुलावा
मीलन होता मधुभावाचे
ह्या जन्माचे सार्थक झाले
गीत – किशोर पाठक
संगीत – पं. जितेंद्र अभिषेकी
स्वर- शौनक अभिषेकी
नाटक – कधीतरी कोठेतरी
गीत प्रकार – नाट्यसंगीत
छत आकाशाचे आपुल्या घराला, सखये
तृणांकुरांची शय्या आणिक तुझाच बाहु उशाला,
या शापित आयुष्याला
छत आकाशाचे आपुल्या घराला, सखये
गळ्यात घालुनी गळे सखये मिळुनी ही धुंद करू उपवने
सुरांत मिसळून सूर उलगडू दोन जिवांची मने
स्वैर मोकळे पिसाट जगूया भिरकावुनी दुनियेला
या शापित आयुष्याला
छत आकाशाचे आपुल्या घराला, सखये
साहु कशी विजने प्रियतमे, जाऊ नको परदेशी
तुझ्यावाचुनी मोडून घरटे होईन मी वनवासी
पंख नभाचे लावून उडुया, सोडून या धरतीला
या शापित आयुष्याला
छत आकाशाचे आपुल्या घराला, सखये
गीत – किशोर पाठक
संगीत – पं. जितेंद्र अभिषेकी
स्वर- अजितकुमार कडकडे
नाटक – कधीतरी कोठेतरी
गीत प्रकार – नाट्यसंगीत