नको प्रिया छेड काढू, नको मला ओढू
माझ्या अंतरीचे नको सूर छेडू
अनामिक ओढ माझ्या मनामध्ये जागे
तुला पुन्हा भेटायाची हुरहुर लागे
तुझ्या रेशमी बंधांनी अशी नकोनको प्रित जोडू
फुलायाची हौस नाही, कळी गोड वाटे
स्वप्‍न एक मंतरलेले लोचनांत दाटे
प्रिया खेळ हा रंगला असा नकोनको खंड पाडू
गीत – उमाकांत काणेकर
संगीत – श्रीकांत ठाकरे
स्वर- दिलराज कौर
गीत प्रकार – भावगीत
नको मेनका, नको उर्वशी, नको अप्सरा कुणी
मदिरेहुनही धुंद अशी ती मला हवी पद्मिनी
तिचे असावे सुंदर डोळे
केस रेशमी काळे-काळे
हृदयामधले भाव दिसावे नेत्रांच्या दर्पणी
हवे गुलाबी गाल बोलके
अमृत भरले अधर लाडके
तिच्या सारखी तीच असावी प्रणयधुंद कामिनी
गीत – उमाकांत काणेकर
संगीत – एन्‌. दत्ता
स्वर- महेंद्र कपूर
चित्रपट – शांतता ! खून झाला आहे
गीत प्रकार – चित्रगीत
नको भव्य वाडा, नको गाडी-घोडा
अनाडी असे मी तुझा प्रेमवेडा
तुझ्या आणि माझ्या घडू दे ना भेटी
तुला या दिलाची येईल कसोटी
बेहोश मन हे, तुझा त्यास ओढा
मला वाचु दे ना तुझी नेत्रभाषा
किती काळ सोसू उरी मी निराशा
बेचैन हृदया तू दे धीर थोडा
गीत – उमाकांत काणेकर
संगीत – श्रीकांत ठाकरे
स्वर- महंमद रफी
गीत प्रकार – भावगीत