हरवले ते गवसले का? गवसले ते हरवले का?
मीलनाचा परिमल तोचि, फूल तेचि त्या स्वरूपी
पाकळ्यांच्या उघडझापी, हास्य उमले वेगळे का?
पावसाळी ग्रीष्म सरिता, सागराला फिरूनि मिळता
जलाशयाची सृष्टी आता, मृगजळे ही व्यापिली का?
दूर असता जवळी आले, जवळी येता दूर गेले
जो न माझे दुःख हसले, तोचि सुखही दुखावले का?
गीत – पी. सावळाराम
संगीत – वसंत प्रभु
स्वर- लता मंगेशकर
राग – पूर्वा कल्याण
गीत प्रकार – भावगीत
घट डोईवर घट कमरेवर
सोडी पदरा नंदलाला
कुणीतरी येईल, अवचित पाहिल
जाता जाता आगही लाविल
सर्व सुखाच्या संसाराला
हलता कलता घट खिंदळता
लज्जेवरती पाणी उडता
नकोच होईन मीच मला
केलीस खोडी, पुरे एवढी
जोवर हसते मनात गोडी
हसुनी तूही हो बाजूला
गीत – पी. सावळाराम
संगीत – वसंत प्रभु
स्वर- लता मंगेशकर
गीत प्रकार – हे श्यामसुंदर, भावगीत
हृदयी जागा तू अनुरागा,
प्रीतीला या देशील का?
बांधिन तेथे घरकुल चिमणे
स्वर्गाचे ते रूप ठेंगणे
शृंगाराचे कोरीव लेणे,
रहावयाला येशील का?
दोन मनांची उघडी दारे
आत खेळते वसंतवारे
दीप लोचनी सदैव तू रे,
संध्यातारक होशील का?
घराभोवती निर्झर नाचे
जाणुन अपुल्या गूढ मनाचे
झाकुन डोळे एकान्‍ताचे,
जवळी मजला घेशील का?
गीत – पी. सावळाराम
संगीत – वसंत प्रभु
स्वर- लता मंगेशकर
राग – पहाडी
गीत प्रकार – भावगीत
कुणी न मालक, कुणी न सेवक, जनता जेथे राज्य करी
हरिचे प्यारे हरिजन सारे समतेच्या मंदिरी
गगनभेदी उंच हवेली
तिथेच काही दीन झोपडी
शाल पांघरुन धनिक झोपतो
वस्त्राविण ही गरिबी उघडी
धनिक न कोणी, गरीब न कोणी, एक चूल ती घरोघरी
प्रत्येकाचे नाव प्रभू तो
कणाकणावर सदैव लिहितो
ज्याचे त्याला कण ते मिळता
कोण उपाशी कसा राहतो?
कुणी न उपाशी, कुणी न अधाशी, नसेल जेथे कुणी भिकारी
मायपित्याचे दर्शन घ्याया
वंचित झालो आम्ही लेकरे
बंधमुक्त ही त्यास कराया
एकजुटीने चला चला रे
आम्ही न साधू, आम्ही न भोंदू, सत्यशांतीचे आम्ही पुजारी
गीत – पी. सावळाराम
संगीत – विश्वनाथ मोरे
स्वर- आशा भोसले
चित्रपट – माय माउली
गीत प्रकार – चित्रगीत, स्फूर्ती गीत
खरा ब्राह्मण नाथची झाला
जो महारा घरी जेवला
गोदावरीचे करुनी स्‍नान
पवित्र पावन नाथा देखुन
दुष्ट थुंकितो अंगावरती
क्रोध जाळितो शंभरवेळा
पददलितांचे मूल तान्हुले
रडता स्फुंदुन कडे घेतले
मुके पटापट घेता त्याचे
हसवी खुदुखुदु बालप्रभुला
घरात आमुच्या पुरणपोळी
तुमच्यासाठी नाथा केली
महाराची ती पोर बोलता
बोट धरुनी संत चालला
धूप घालता सुवास सुटला
मागेपुढती पाट मांडिला
नाथांनी मुखी घास घालता
पुंडलिक वरदा हरी बोला
गीत – पी. सावळाराम
संगीत – विश्वनाथ मोरे
स्वर- सुधीर फडके
चित्रपट – माय माउली
गीत प्रकार – चित्रगीत
लखलखले आभाळ निळे
रोहिणीला चंद्र मिळे
दोन जिवांची दुनिया आपुली
तरूतळी या हृदयाजवळी
छेडित वीणा युगे चालली
सूर जुळले, तेज उसळे
तुझी प्रकाशा मी पडछाया
चालत मागुन सदैव राया
माय प्रीतिची हसरी माया
अमृत काया, भाग्य उजळे
गीत – पी. सावळाराम
संगीत – वसंत प्रभु
स्वर- लता मंगेशकर
चित्रपट – मायेचा पाझर
गीत प्रकार – चित्रगीत
लखलख चांदणं कोजागरीचं
टपोरं डोळ्यांनी बघायचं रं,
रातभर सजणा जागायचं रं !
चंदेरी फुलांच्या गोफुन माळा
चल ये सजणे घाल माझ्या गळा
झिमझिम शिंपीत प्रीतिचं चांदणं
जोडीनं गोडीनं फिरायचं
टपोरं डोळ्यांनी बघायचं रं,
रातभर सजणा जागायचं रं !
कुणी नाही इथं हिरव्या रानात
गुलाबी गुपीत सांग माझ्या कानात
खसखस पिकली पिंपळ पानात
खुदकन मनात हसायचं
टपोरं डोळ्यांनी बघायचं रं,
रातभर सजणा जागायचं रं !
तेजाचा पाऊस भुईवर पडतोय
प्रीतिचा पारवा नभात उडतोय
फेर धरी चांदवा नाचते पुनवा
रंगात ढंगात नाचायचं
टपोरं डोळ्यांनी बघायचं रं,
रातभर सजणा जागायचं रं !
गीत – पी. सावळाराम
संगीत – स्‍नेहल भाटकर
स्वर- आशा भोसले, दशरथ पुजारी
चित्रपट – मानला तर देव
गीत प्रकार – चित्रगीत, युगुलगीत, शब्दशारदेचे चांदणे, नयनांच्या कोंदणी
मजवरी माधव रुसला बाई, काही केल्या बोलत नाही
सोनपाऊले मी आसवांनी, न्हाऊ घातली करकमलांनी
पूजा बांधिली भावफुलांनी, उधळुनी मजला लोटुन देई
लगटुनि अंगा किती विनविले, बोल नाही तर- मी पण रुसले
रुसता रुसता मधेच हसले, हरि गोजिरा- हसला नाही
तव हृदयाची चोरी केली, राधेची का आगळिक झाली
अनंत हृदये तुवा चोरिली, राग कधी कुणी धरला नाही
गीत – पी. सावळाराम
संगीत – वसंत प्रभु
स्वर- आशा भोसले
गीत प्रकार – हे श्यामसुंदर, भावगीत
ओळखले मी ओळखले
तुझ्या दिलवरा मनातले
तव नयनांची या नयनांनी
धरली हळवी प्रीत शिकवणी
नजरेच्या त्या मुळाक्षरांनी
कशि लाजाया नकळत शिकले
हेच नेमके असेल पुसले
शिकता शिकता डोळे खिळले
हात रेशमी गळ्यात रुळले
ओठावरती गीतही जुळले
शब्दाविण ते नव्हते कळले
तेच नेमके असेल लिहिले
गीत – पी. सावळाराम
संगीत – वसंत प्रभु
स्वर- लता मंगेशकर
चित्रपट – मायेचा पाझर
गीत प्रकार – चित्रगीत
ओळख पहिली गाली हसते
सांग दर्पणा कशी मी दिसते
आषाढीच्या तिन्हीसांजेला
पैलतिरी त्या पाणवठ्याला
बघुनी ज्याला जीव लाजला
आठवण त्याची हृदयी ठसते
नाव जयाचे घुमता कानी
चित्र रंगते मिटल्या नयनी
बाहुपाशी जाता विरुनी
माझ्यावर मी जेव्हा रुसते
करी बांगडी राजवार्खी
नथणी-बुगडी तुझ्यासारखी
तुझ्यापरी तो रत्‍नपारखी
म्हणुनी तुजला घडी घडी पुसते
गीत – पी. सावळाराम
संगीत – वसंत प्रभु
स्वर- आशा भोसले
गीत प्रकार – भावगीत
पर्णपाचू सावळा सावळा, विठ्ठल माझा मळा
मी वारकरी आगळा
समानतेच्या विहिरीमधली पुण्याईची चंद्रभागा
न्हाऊ घालते पावन करते, चराचरातील पांडुरंगा
पाटामधुनी तीर्थ चालले, पिकवित कांदा-भाजी-मुळा
मणिमोत्यांचा मंदिल बांधुन डुलत शिवारी राव जोंधळा
विठ्ठल नामे कणकण टिपतो पाखरांचा हसरा मेळा
ऊसात भरता रसाळ गोडी, मोर सांगतो निळा
तीर्थरूप त्या प्राणपित्याची मीच समाधी बांधलेली
भावभक्तीची फुले वाहिली हात जोडुनी सांजसकाळी
या मातीचा अबिर कपाळी, भक्त पुंडलीक पुत्र खुळा
गीत – पी. सावळाराम
संगीत – विश्वनाथ मोरे
स्वर- सुधीर फडके
चित्रपट – भालू
गीत प्रकार – चित्रगीत
रघुनंदन आले आले, धरणी माता कानी बोले
शिरीष कुसुमाहुनीही कोमल, कोमेजुन ती काया जाईल
सप्तस्वर्ग तो लवुनी खाली, धरुनि चालला छ्त्र साउली
रविचा रथ हळूहळू चाले
वृक्षलतांनो हृदय फुलांच्या, चरणाखाली रघुरायाच्या
पायघड्या या लवकरी घाला, माझ्यासाठी सांगा त्याला
शिळा अहिल्या हो झाले
पाऊलातली धूळ होउनी, बसली होती ती संजीवनी
भाळी लावता होईन पावन, आणिक रामा तुझेच दर्शन
धन्य मी पतिता झाले
गीत – पी. सावळाराम
संगीत – वसंत प्रभु
स्वर- लता मंगेशकर
गीत प्रकार – राम निरंजन, भावगीत
फुटतो पान्हा पुन्हा पुन्हा
कुणी तरी माझे बाळ आणा
रेशमाचे कुंची-झबले
या हातांनी मी शिवलेले
तसेच हाती राहुन गेले, घालून पाहू आता कुणा?
बाळ निजेची वेळ येते
पाळण्याची दोरी हलते
गहिवरता मी जो जो म्हणते, पाळणा हले सुना सुना
बाळ कुशीला देण्यासाठी
चिमणे चुंबन घेण्यासाठी
जितुके जीवन असेल गाठी देईन तुजला दयाघना
गीत – पी. सावळाराम
संगीत – वसंत प्रभु
स्वर- आशा भोसले
चित्रपट – बाळ माझं नवसाचं
गीत प्रकार – चित्रगीत
रघुपति राघव गजरी गजरी
तोडित बोरे शबरी
ध्यानी जपली मनी पूजिली
रघुनाथाची मूर्त सावळी
बघावयाला याच डोळी
आतुरलेली किती अंतरी
रामनाम ते वदता वाचे
अमृत लाघव अधरी नाचे
हाती येता फळ भक्तीचे
चाखित होती नाम माधुरी
भजनी रमुनी भिल्लिण शामा
म्हणते लवकर ये रे रामा
आलिंगुनीया भक्ति प्रेमा
स्वर्ग बघू दे मला भूवरी
गीत – पी. सावळाराम
संगीत – वसंत प्रभु
स्वर- आशा भोसले
राग – मिश्र जोग
गीत प्रकार – राम निरंजन, भावगीत
आलिंगुनी अंगिकारा, बाप रखुमाईच्या वरा
सोडूनिया घरदारा, सखू आली पंढरपूरा
अनवाणी पायपिटी, किती केली आटाआटी
सगुणरूप भेटीसाठी तोडिल्या मी बंधनगाठी
तुळशीहार घाली कंठी, विटूनिया संसारा
संत तुकोबाची वाणी, भक्तीची ती शिकवणी
लागता मी तुझ्या भजनी, छळिली ही सुवासिनी
सर्वसाक्षी सर्वज्ञानी, तुला ठावे परमेश्वरा
सार्‍या इंद्रियांचे प्राण डोळियांत व्याकळून
मायबाप तुला शरण मागते मी विनवून
दिला जन्म देई मरण, लेकिला या विश्वंभरा
गीत – पी. सावळाराम
संगीत – वसंत प्रभु
स्वर- लता मंगेशकर
गीत प्रकार – विठ्ठल विठ्ठल, भक्तीगीत
सखी ग, मुरली मोहन मोही मना
गाऊ किती पुन्हा पुन्हा, त्याच्या गुणा
शृंगाराची प्रीत करिता चिंतन
अनुराग त्याचा देता आलिंगन
चंदनाचा गंध येतसे पंचप्राणा
कानी येता ज्याच्या बासुरीचे सूर
कालिंदीला येता आनंदाचा पूर
गोपिकांच्या घरी प्रीतीचा पाहुणा
गीत – पी. सावळाराम
संगीत – पं. हृदयनाथ मंगेशकर
स्वर- आशा भोसले
चित्रपट – धर्मकन्या
गीत प्रकार – चित्रगीत, हे श्यामसुंदर
श्रीरामा घनश्यामा बघशिल कधी तू रे?
तुझी लवांकुश बाळे
वनवासाच्या घरात माझ्या अरुण-चंद्र हे सवे जन्मता
विरह प्रीतिचे दु:खही माझे हसले रघुनाथा
विश्वाची मी मंगल माता, तुझी लाडकी सीता
तुझ्याविना रे आनंदाला गालबोट लागले
रूप मनोहर तुझी पाहिली यौवनातली कांती
बाळांच्या या रूपे बघते तुझ्याच चिमण्या मूर्ति
पूर्ण पाहिले तुला राघवा परि ही दैवगती
तुझे बालपण तुझ्यापरी का वनवासी झाले?
बघायचे जर नसेल मजला ये ना बाळांसाठी
चार करांचा कोमल विळखा पडु दे श्यामलकंठी
ताटातुटीच्या भेटी घडता झरझर अमृत ओठी
मिटुनी डोळे म्हणेन माझे रामायण संपले
गीत – पी. सावळाराम
संगीत – वसंत प्रभु
स्वर- लता मंगेशकर
राग – मिश्र रागेश्री
गीत प्रकार – राम निरंजन, भावगीत
टक्‌टक्‌ नजर पडतोय्‌ पदर
नार तोर्‍यात नखर्‍यात चालते
डाव्या डोळ्याची शीळ अशी घालते
रंगानं सावळा, दिसायला देखणा
मनात भरला वळखीचा पावणा
हसतोय्‌ गालात करतोय्‌ खुणा
नजरेला नजर बाई ग, तुझीमाझी जुळते
पदराचा पतंग व्हटात धरला
धुंदीचा वारा अंगात शिरला
मनाचा भवरा गरगर फिरला
मदनाच्या मिठीत ही ग, कमळण डुलते
गीत – पी. सावळाराम
संगीत – दत्ता डावजेकर
स्वर- आशा भोसले
चित्रपट – सून लाडकी या घरची
गीत प्रकार – चित्रगीत, लावणी, नयनांच्या कोंदणी
वाजत डंका दाही दिशेला
जग जिंकाया बाळ चालला
चौखुर वारू गती ग्रहगोला
जय ललकारी तिन्हीत्रिकाला
नयनमंदिरी बसुनी आता
चित्र रेखिते माझी ममता
दिसमासाने अरुण वाढता
बाळपणाला यौवन हसता
थोरपणाही हसू लागला
कर्तव्याची धाव तुफानी
जुलमी सत्ता पायी तुडवुनी
पराक्रमाची वज्र लेखणी
कोरू लागली अक्षर लेणी
तोरण बांधी गडागडाला
गीत – पी. सावळाराम
संगीत – सी. रामचंद्र
स्वर- लता मंगेशकर
चित्रपट – छत्रपति शिवाजी
गीत प्रकार – चित्रगीत, प्रभो शिवाजीराजा
वसंत जेथे तेथे सुमने
सुमनांपरी ही दोन मने
दोन मनांतुन प्रीत दरवळे
रंग एक परि गंध वेगळे
दोन मनांतुन प्रीत दरवळे
बकुळफुलांचे घुंगुर बांधून
प्रीत सुगंधा करिते नर्तन
नादमधूर या झंकारातून
भाव मनीचा तुला मिळे
शुभ्र धवल मोगरीची
पुष्पमाळ गुंफिते
चैत्र पौर्णिमेची सख्या
प्रीत वाट पाहते
क्षणाक्षणाची आस तुझी
लाख युगे मोजिते
अंतरीच्या मूर्तीला मी
भावफुले वाहते
वसंत जेथे तेथे सुमने
सुमनांपरी ही दोन मने
दोन मनांतुन प्रीत दरवळे
गीत – पी. सावळाराम
संगीत – राम कदम
स्वर- आशा भोसले, उषा मंगेशकर
चित्रपट – छंद प्रीतीचा
गीत प्रकार – चित्रगीत