हरीभोवती नित्य नाचतो
भक्तांचा मेळा
हरी भक्तिचा भुकेला
पहाटसमयी जात्यावरती
दळू लागला जनीसंगती
ओवी गाऊन हा जगजेठी
भक्ताघरी रंगला
घास घेई नारायणा
नामदेव तो हट्ट सोडिना
श्रीपतिराणा त्रिभुवनाचा
भक्तासवे जेवला
कबिराघरचे विणले शेले
भक्त-प्रभु ते एकची झाले
भक्तासवे त्या प्रभु नाचले
घेउनी भक्ति-ध्वजा
गीत – योगेश्वर अभ्यंकर
संगीत – गोविंद पोवळे
स्वर- माणिक वर्मा
गीत प्रकार – हे श्यामसुंदर, भक्तीगीत
श्रीरामाचे दर्शन घडले
पाषाणातुनी शब्द उमटले
अपराधाची जाणीव नसता
घडले काही दीनानाथा
गुन्हेगार मी गौतम वदता
अपराधाने लज्जित झाले
अपराधाचे शासन म्हणुनी
भूवरी पडले शीळा होउनी
आज संपली करुण कहाणी
पदस्पर्शाने पावन झाले
पतितांना तू करिसी पावन
जन वदती तुज पतितपावन
सरले माझे देवा ‘मी’पण
तुझ्या कृपेने जीवन तरले
गीत – योगेश्वर अभ्यंकर
संगीत – एम्. जी. गोखले
स्वर- सुमती टिकेकर
गीत प्रकार – भावगीत, राम निरंजन
नेऊ नको माधवा, अक्रूरा
नेऊ नको माधवा
क्रूर अक्रूरा नकोस नेऊ
आनंदाचा ठेवा
खेळगडी तो गोपाळांचा
गिरिधारी रे भक्तजनांचा
तारी गोकुळ कान्हा अमुचा
सर्व सुखाचा अमोल ठेवा
कुंजवनी रे रास रंगली
तालावरती टिपरी घुमली
धुंद रात्र रे स्वप्नी उरली
ऐकू दे मज मंजुळ पावा
नकोस नेऊ बालमुकुंदा
वेडी होईल गौळण राधा
तुला विनविती नंद-यशोदा
नेऊ नको माधवा
गीत – योगेश्वर अभ्यंकर
संगीत – दशरथ पुजारी
स्वर- सुमन कल्याणपूर
गीत प्रकार – हे श्यामसुंदर, भावगीत
अजिंक्य भारत अजिंक्य जनता
ललकारत सारे
ध्वज विजयाचा उंच धरा रे
मातीमधल्या कणाकणातुन
स्वातंत्र्याचे घुमते गायन
प्रगतीचे रे पाऊल पुढले
संघटनेचा मंत्र जपा रे
भाग्यवान ते जवान सगळे
हासत खेळत रणी झुंजले
स्वातंत्र्यास्तव मरण जिंकले
मान राखला मातृभूमीचा रे
इतिहासाच्या पानोपानी
बलिदानाची घुमती गाणी
धनदौलत रे देऊ उधळून
पराक्रमाचे गीत गाउया रे
गीत – योगेश्वर अभ्यंकर
संगीत – पं. हृदयनाथ मंगेशकर
स्वर- जयवंत कुलकर्णी, शरद जांभेकर
गीत प्रकार – स्फूर्ती गीत
एकतारी गाते
गाते गीत विठ्ठलाचे
वाळवंटी ध्वजा
ध्वजा वैष्णवांची नाचे
मराठीचा बोल
बोल जगी अमृताचा
ज्ञनियांचा देव
देव ज्ञानदेव नाचे
नाचे चोखामेळा
मेळा नाचे वैष्णवांचा
नाचे नामदेव
देव कीर्तनात नाचे
अनाथांचे नाथ
नाथ माझे दीनानाथ
भाग्यवंत संत
संतरूप अनंताचे
गीत – योगेश्वर अभ्यंकर
संगीत – श्रीनिवास खळे
स्वर- माणिक वर्मा
राग – मिश्र रागेश्री
गीत प्रकार – भक्तीगीत, विठ्ठल विठ्ठल
घनश्याम पाहिला
मी घनश्याम पाहिला
दहीदुध लोणी हरी चोरिले
उखळाला मग तया बांधिले
धडपड करी ते हात चिमुकले
तो नंदलाला पाहिला
मोरपिसांचा मुकुट शोभतो
अधरी पावा मधुर वाजतो
गोपगोपिकांसवे नाचतो
मुरलीधर मी पाहिला
मेघासम तो श्याम सावळा
हृदयमंदिरी माझ्या लपला
स्वप्नी दिसला मधुर हासला
मनमोहन मी पाहिला
गीत – योगेश्वर अभ्यंकर
संगीत – दशरथ पुजारी
स्वर- सरस्वतीबाई राणे
गीत प्रकार – हे श्यामसुंदर, भावगीत