टप् टप् पडती अंगावरती प्राजक्ताची फुले
भिर् भिर् भिर् भिर् त्या तालावर गाणे अमुचे जुळे !
कुरणावरती, झाडांखाली
ऊन-सावली विणते जाळी
येतो वारा पाहा भरारा, गवत खुशीने डुले !
दूर दूर हे सूर वाहती
उन्हात पिवळ्या पहा नाहती
हसते धरती, फांदीवरती हा झोपाळा झुले !
गाणे अमुचे झुळझुळ वारा
गाणे अमुचे लुकलुक तारा
पाऊस वारा मोरपिसारा, या गाण्यातुन फुले !
फुलांसारखे सर्व फुला रे
सुरांत मिसळुनि सूर चला रे
गाणे गाती तेच शहाणे, बाकी सारे खुळे !
गीत – मंगेश पाडगांवकर
संगीत – वसंत देसाई
स्वर- वाणी जयराम, आकाशवाणी गायकवृंद
गीत प्रकार – बालगीत
