तुझे सर्वरंगी रूप उदारा, कळले सांग कुणाला?
खेळ तुझा न्यारा, प्रभु रे खेळ तुझा न्यारा !
स्वार्थाभवती दुनिया फिरते
बेईमान ठरते भलाई, बेईमान ठरते
सौद्यासाठी जुळते नाते फसवा भावफुलोरा !
आशेमधुनी जीवन फुलते
मरणाशी अडते पाऊल, मरणाशी अडते
हे मायावी मृगजळ खोटे उरतो दूर किनारा !
दोन दिसांची सगळी नाती
कुणी न उरे अंती सोबती, कुणी न उरे अंती
पैलतिराची हाक ऐकता स्मरतो एक सहारा !
गीत – वंदना विटणकर
संगीत – श्रीकांत ठाकरे
स्वर- महंमद रफी
गीत प्रकार – भक्तीगीत
खेळ कुणाला दैवाचा कळला
मी असो, तू असो, हा असो, कुणी असो
दैवलेख ना कधी कुणा टळला
जवळ असुनही कसा दुरावा
भाव मनीचा कुणा कळावा
हार कुणाची? जीत कुणाची
झुंज चालली दोन मनांची
सौभाग्याला मिळे सहारा
मला न माहित कुठे किनारा
गीत – वंदना विटणकर
संगीत – रामलक्ष्मण
स्वर- आशा भोसले, उषा मंगेशकर, सुरेश वाडकर
चित्रपट – देवता
गीत प्रकार – चित्रगीत
नको आरती की नको पुष्पमाला
प्रभु भोवताली असे व्यापलेला
खगांच्या मुखाने प्रभु गाई गाणे
फुलांतून उधळी सुगंधी उखाणे
गगनांत फुलवी नवरंग-लीला
सदासर्वकाळी दुज्यांसाठी झिजतो
पुण्यवान जगती खरा तोच जगतो
त्यागात मनुजा उभा स्वर्ग भरला
प्रकाशात फुलतो अंधार काळा
उन्हापाठी पळतो कसा पावसाळा
बुडे प्रेमरंगी कळे खेळ त्याला
गीत – वंदना विटणकर
संगीत – श्रीकांत ठाकरे
स्वर- महंमद रफी
गीत प्रकार – भक्तीगीत
थंड ही हवा, धुंद गारवा
हा पाऊस रिमझिम बरसे !
रेशिमधारा या रुणझुणती
जलथेंबांचे उधळित मोती
पानफुले नाचती, गंधफुले भोवती
झुलती जलांचे आरसे !
काजळकाळ्या या आकाशी
वीज रेखिते सुंदर नक्षी
वारा खुळा होउनी, नाचे कसा अंगणी
गाणे खुषीचे गातसे !
हिरवी शेते हिरवी राने
फुलली भवती हिरवी कवने
नटली बघा ही धरा, झोक तिचा साजिरा
नवरी नवेली ही दिसे !
गीत – वंदना विटणकर
संगीत – डी. एस्. रुबेन
स्वर- पुष्पा पागधरे
गीत प्रकार – भावगीत, ऋतू बरवा
थकले प्रिया कधीची मी वाट पाहुनी
वाटे तुझ्याविना रे मैफल् सुनी सुनी
त्या रेशमी स्मृतींचा श्रुंगारसाज ल्याले
सुखस्वप्न मीलनाचे हृदयी अधीर झाले
गाऊ कशी रसीली मी प्रीतरागिणी?
का ओसरून गेली फुलताच स्वप्नमाया
घायाळ लोचनांना भासे उदास दुनिया
छळते मला नशीली ती धुंद मोहिनी
भारावल्या मनी रे घुमतो तुझा पुकारा
झाला तुझ्याचसाठी आतुर जन्म सारा
ध्यासात आज गेले हे विश्व लोपुनी
गीत – वंदना विटणकर
संगीत – सुधीर फडके
स्वर-
चित्रपट – चोराच्या मनांत चांदणे
गीत प्रकार – चित्रगीत
अगं पोरी संबाल दर्याला तुफान आयलंय भारी
लाट पिर्तीची भन्नाट होऊन आभाली घेई भरारी
नाय भिनार ग येऊ दे पान्याला भरती
माज्या होरीचं सुकान तुज्याच हाती
नाव हाकीन मी कापीत पाऊसधारा
मनी ठसला रं तुजा ह्यो मर्दानी तोरा
जाल्यांत गावली सोनेरी मासली-
नको करू शिर्जोरी
तुज्या डोल्यांत ग घुमतोय वादलवारा
तुज्या भवती रं फिरतोय मनाचा भौरा
तुला बगून ग उदान आयलंय मनाला
तुज्या पिर्तीचं काहूर जाली जिवाला
सुटणार नाय ग, तुटणार नाय ग-
तुजी नि माजी जोरी
मी आणिन तुला जर्तारी अंजिरी सारी
मला पावली रं पिर्तीचि दौलत न्यारी
मी झुंजार ! साजिरी तू माझी नौरी
तुज्या संगतीनं चाखीन सर्गाची गोरी
थाटातमाटात गुल्लाबी बंगला-
बांदूया दर्याकिनारी
गीत – वंदना विटणकर
संगीत – श्रीकांत ठाकरे
स्वर- पुष्पा पागधरे, महंमद रफी
गीत प्रकार – कोळीगीत, युगुलगीत
ए आई मला पावसात जाऊ दे
एकदाच ग भिजुनी मला चिंब चिंब होऊ दे
मेघ कसे बघ गडगड करिती
वीजा नभांतुन मला खुणविती
त्यांच्यासंगे अंगणात मज खूप खूप नाचू दे
बदकांचा बघ थवा नाचतो
बेडुकदादा हाक मारतो
पाण्यामधुनी त्यांचा मजला पाठलाग करू दे
धारेखाली उभा राहुनी
पायाने मी उडविन पाणी
ताप-खोकला-शिंका सर्दी, वाट्टेल् ते होऊ दे
गीत – वंदना विटणकर
संगीत – मीना खडीकर
स्वर- योगेश खडीकर
गीत प्रकार – बालगीत, ऋतू बरवा
अंधाराची खंत तू कशाला करिसी रे?
गा प्रकाशगीत !
रोज नवी ही उषा उगवते
कवच भेदुनी अंधाराचे
कळीकळीच्या कोशामधुनी
निसर्ग गातो गीत उद्याचे
संजीवन हसते नाशामधुनी, हीच जगाची रीत !
दु:ख निराशा दूर सारुनी
सदा पडावे पाऊल पुढती
गतकाळाची कशास भीती?
भविष्य अपुले अपुल्या हाती
फुलव निराळे तुझ्या मुठीतुनी, तूच तुझे संचित !
गीत – वंदना विटणकर
संगीत – डी. एस्. रुबेन
स्वर- जयवंत कुलकर्णी
गीत प्रकार – भावगीत
अंतरंगी रंगलेले गीत झाले पोरके
दु:ख माझे हे मुके !
बहरलेल्या मीलनाचे सूर होते लागले
चित्र मोहक नंदनाचे लोचनांनी पाहिले
उघडता परि नेत्र केवळ भोवती दाटे धुके
दु:ख माझे हे मुके !
बंध सारे तोडुनी मी घेतली होती उडी
अमृताने नाहली रे उत्सवाची ती घडी
त्या स्मृतीचा कैफ लेवुन आज हसती हुंदके
दु:ख माझे हे मुके !
तव स्मृतीचा कोष बसला विश्व माझे व्यापुनी
सहज तू गेलास अदया, सर्व धागे तोडुनी
क्षणभरी उमलून विरले स्वप्न नवथर लाडके
दु:ख माझे हे मुके !
वंचनेची यातना रे दे मला तू लाखदा
मजवरी केलीस प्रीती सांग हे परि एकदा
क्षण सुखाच्या मोहराचे फिरुन होतिल बोलके
दु:ख जरि माझे मुके !
दु:ख माझे हे मुके !
गीत – वंदना विटणकर
संगीत – अनिल मोहिले
स्वर- कृष्णा कल्ले
गीत प्रकार – भावगीत
छेडिली मी आसावरी
आली उमलुनी धुंद शर्वरी
भावफुलांचे मोरपिसारे
बघता बघता फुलले सारे
स्वप्नसुगंधित हसले वारे
आली बहरुनी गंधमाधुरी
धागे जुळले कैसे? कोठे?
जागे नयनी नवखे नाते
हृदयी हुरहुर कसली दाटे?
तनमन उधळी ही तान भरजरी
गीत – वंदना विटणकर
संगीत – दत्ता डावजेकर
स्वर- सुधीर फडके
नाटक – आसावरी
गीत प्रकार – नाट्यसंगीत