इथेच आणि या बांधावर अशीच श्यामल वेळ
सख्या रे, किती रंगला खेळ !
शांत धरित्री शांत सरोवर
पवन झुळझुळे शीतल सुंदर
अबोल अस्फुट दोन जिवांचा अवचित जमला मेळ.
रातराणीचा गंध दरवळे
धुंद काहीसे आतुन उसळे
चंद्र हासला, लवली खाली नक्षत्रांची वेल.
पहाटच्या त्या दंवात भिजुनी
विरली हळूहळू सुंदर रजनी
स्वप्नसुमांवर अजुनी तरंगे ती सोन्याची वेळ.
गीत – कवी सुधांशु
संगीत – विठ्ठल शिंदे
स्वर- माणिक वर्मा
गीत प्रकार – शब्दशारदेचे चांदणे, भावगीत
लपून बसली राधा गौळण
वेडा होऊन शोधी मोहन
इथे धुंडितो, तिथे धुंडितो
न मिळे राधा, व्यथित हिंडतो
लपल्या जागी हसते राधा
श्रीकृष्णाला दु:खी पाहून
हळवे झाले मन राधेचे
बघवेना ते दु:ख हरीचे
हळूच येऊन नयन झाकिते
हरी नाचतो हर्षे न्हाऊन
वेडी राधा वेडी राधा
फसवू बघते जगदानंदा
गोपाळांचा बनून सौंगडी
लीला-नाटक दावी मोहन
गीत – कवी सुधांशु
संगीत – दशरथ पुजारी
स्वर- सुमन कल्याणपूर
गीत प्रकार – भावगीत, हे श्यामसुंदर
दत्तदिगंबर दैवत माझे
हृदयी माझ्या नित्य विराजे
अनुसूयेचे सत्त्व आगळे
तीन्ही देवही झाली बाळे
त्रैमूर्ती अवतार मनोहर,
दीनोद्धारक त्रिभुवनि गाजे
तीन शिरे कर सहा शोभती
हास्य मधुर शुभ वदनावरती
जटाजूट शिरि पायी खडावा,
भस्मविलेपीत कांती साजे
पाहुनी प्रेमळ सुंदर मूर्ती
आनंदाचे आसू झरती
सारे सात्त्विक भाव उमलती,
हळू हळू सरते मीपण माझे
गीत – कवी सुधांशु
संगीत – आर. एन्. पराडकर
स्वर- आर. एन्. पराडकर
गीत प्रकार – भक्तीगीत, दिगंबरा दिगंबरा