हय्‌ पावलाय देव मला मल्हारी

हय्‌ पावलाय देव मला मल्हारी
आरं देवा तू धाव रे धाव रे मल्हारी
देवा तू नवसाला पावलाय्‌ मल्हारी
देवाची सोन्याची जेजुरी मल्हारी
गडाला नवलाख पायरी मल्हारी
देव माझा गडावर निगाला मल्हारी
देवाला आंगोली घालतान मल्हारी
आरं देवाची आंगोली करतान्‌ मल्हारी
देवा माझा गडावर निगाला मल्हारी
आरं देवा तू धावरे धावरे मल्हारी
देवा तू नवसाला पावलाय्‌ मल्हारी

देवा तू धावरे धावरे मल्हारी
देवा तू नवसाला पाव रे मल्हारी
हयले, हयले, हयले, गो
हयले, हयले, हयले, गो

गीत –

संगीत – शाहीर साबळे

स्वर- शाहीर साबळे

गीत प्रकार – कोळीगीत

सुखाचा तिचा गोड संसार होता

सुखाचा तिचा गोड संसार होता
कुणाची कशी दृष्ट त्या लागली
जळी सोडलेले दिवे दूर गेले
तरी सर्व नाती तिने सांधली
जगावेगळी !

जरी संकटी पावलोपावली
उभारी तरी ना तिची भंगली
उन्हे सोसुनी दे जगा साउली
जगावेगळी !

गीत –

संगीत –

स्वर- देवकी पंडित

गीत प्रकार – मालिका गीते

  टीप – • शीर्षक गीत, मालिका- जगावेगळी, वाहिनी- झी मराठी.

पटली नाही ओळख पुरती अजुनी नवखे

पटली नाही ओळख पुरती अजुनी नवखेपणा
अन्‌ राया मला, मलाच अपुली म्हणा

सदा तुम्हा मी जीव लावते
हवे-नको ते तुम्हास पुसते
भोजन रुचकर रोज बनविते
तरी सख्या का अजुनी वाटतो सांगा नवखेपणा
अन्‌ राया मला, मलाच अपुली म्हणा

दिवे लावुनी वाट पाहते
शिणुनी येता पाय चेपते
दूध केशरी रात्री देते
कधी न येतो चुकुनी राजसा शब्द मुखातून उणा
अन्‌ राया मला, मलाच अपुली म्हणा

नको मला हो शालू शेला
वज्रटीक वा मोहनमाळा
सदा मनाला एकच चाळा
जवळी घेउनी कुरवाळा मज सोडा परकेपणा
अन्‌ राया मला, मलाच अपुली म्हणा

गीत –

संगीत –

स्वर- प्रमोदिनी हजारे

गीत प्रकार – लावणी

पद्य : गाउया तयांचे गान, करुनी

पद्य :
गाउया तयांचे गान, करुनी बलिदान,
अर्पिले प्राण, जयांनी बंधमुक्त करण्या
निर्मिला स्फूर्तिदायी इतिहास, जी, जी, जी

खानदेशी ! खानदेशी गाव टुमदार, नाव नंदुरबार,
तिथे सुकुमार, शिरिष नावाचा होता एक बाळ,
सोळा वर्षांचा होता लडिवाळ
परि गोर्‍यांना भासला काळ, जी, जी, जी

आली आली ! आली आली मिरवणुक आली
मुले आणि मुली, होती इवलाली,
उत्साहाला भरती आली अनिवार
इंग्रजांना राग आला त्याचा फार
हुकुम दिला करण्या गोळीबार, जी, जी, जी

गद्य :
पोलीस कृष्ण हृदयाचे, सैतान मनामध्ये नाचे.
सरसावीत बंदुका येती, शिरिषास पकडिले हाती.

तो शिरिष !
तो शिरिष पडला खाली, परि हासत होता गाली.
पोलीस बोलला त्याला, घे पाण्याचा एक कटोरा.

परि शिरिष !
परि शिरिष बोलला त्याला, तू देशद्रोही झाला;
शिवणार न तव पाण्याला.
हे असे ! हे असे बोलता बाळ, संतापून गेला काळ.

आणि मग :

पद्य :
मृत्यूने फूल उचलले मृदुल कोवळे;
जयाला बळे, तुडविले पायी राक्षसांनी,
क्रुर त्या दुष्ट पोलिसांनी,
देशाचे शत्रू बेईमानी हो, जी, जी, जी

धन्य धन्य शिरिषकुमार, जाहला अमर;
शूर आणि वीर, पोवाडा त्याचा स्फूर्तिदायी,
बोध घ्या ह्याच्यामधुनी काही
बिदागी हीच अम्हां भाई हो, जी, जी, जी

<

अभिमन्यूच्या रथी फडकते,

अभिमन्यूच्या रथी फडकते, रणीं ध्वजा आरुणी
तळपते विक्रम सौदामिनी

घोर प्रभंजन घुसळी सागर
तसे भडकले भीषण संगर
कंपित धरणी, कंपित अंबर
भैरवसा त्या रणी भासतो, बाल रथी आर्जुनी
तळपते विक्रम सौदामिनी

चक्रव्यूह तो, द्वार मृत्यूचे
कराल मुख जणू भीषणतेचे
आत उभे रथ धनुर्धरांचे
चाल करी त्या मतंग ज्यावर बाल सिंह गर्जुनी
तळपते विक्रम सौदामिनी

पांडवसेना विजयी होऊन
पुढे निघाली व्युहा भेदून
निघे वाहिनी पहाड फोडून
घन तिमिराच्या राशी नाशित, बाल रवि अग्रणी
तळपते विक्रम सौदामिनी

सरले पुढती द्रोण जयद्रथ
शल्य भोज कृप कर्ण महारथ
अभिमन्यू हो रणी भग्‍न-रथ
तरी तयाचे कौतुक तरळे, द्रोणांच्या लोचनी
तळपते विक्रम सौदामिनी

गीत –

संगीत –

स्वर- स्वर कोणाचा(चे) माहित असल्यास संपर्क करा.

थेंबभर तुझे मन..

थेंबभर तुझे मन.. ओघळले माझ्यावर..
माझ्यापाशी मागत होते एक पाऊस, एक सर

थेंबभर तुझे मन.. बरसले माझ्यावर..
सांगत होते कधि कधि दंवबिंदूंचे बांधु घर

थेंबभर तुझे मन.. फिदा झाले माझ्यावर..
माझ्यासाठी माळत होते अबोलीचे वळेसर

थेंबभर तुझे मन.. कोसळले माझ्यावर..
लाट जशी भरतीची एकाएकी तीरावर

गीत –

संगीत – अवधूत गुप्‍ते

स्वर- अवधूत गुप्‍ते

गीत प्रकार – ऋतू बरवा, भावगीत, मना तुझे मनोगत

थंड थंड अशी हवा हवेमधे गंध नवा

थंड थंड अशी हवा
हवेमधे गंध नवा
हात तुझा हाती हवा, याहुन काही नको !

सांज अशी ही धूसर श्यामल
श्वासांवर दरवळतो परिमल
मनी तुझ्या प्रीतीची चाहूल, याहुन काही नको !

वसंत येथे सदा असावा
फुलांतुनी अनुराग हसावा
कणाकणांतून तोच दिसावा, याहुन काही नको !

ही हिरवी मखमल, हा वारा
ह्या थुईथुई नाचती जलधारा
एक झोपडी हाच निवारा, याहुन काही नको !

गीत –

संगीत – शंकरराव कुलकर्णी

स्वर- आशा भोसले

चित्रपट – आलिया भोगासी

गीत प्रकार – चित्रगीत

गीत –

संगीत –

अजि आले गृहस्थचि माझे प्रियकर

अजि आले गृहस्थचि माझे
प्रियकर दूर देशीचे राजे

शमला अगं संताप पाहुनी
मीलन सूख ते घेता मिळुनी
अधरावरती आनंदाचे मंगल गीत विराजे

घनगर्जित ऐकुनी बावरी
उन्मन होउनी मत्त मयुरी
नाचे थय थय उन्मादाने, रुणुझुणु पैंजण वाजे

भेटताच सखि प्राण जीवना
पळात विझल्या सकल वेदना
अश्रूंची जाहली फुले ग, दु:ख मनोमनी लाजे

चंद्र पाहता फुले कमलिनी
तशीच मीही गेले फुलुनी
दलादलावर स्पर्श उमटला, मला मिळाले माझे

हरि कैवारी भक्तजनांचा
रहिवासी तो सकल मनांचा
मीरा विरहिणी मुक्त जाहली, द्वैत गळाले माझे

गीत –

संगीत – प्रभाकर जोग

स्वर- सुधा मलहोत्रा

गीत प्रकार – हे श्यामसुंदर

टक्का, पट्टू, विकीची- दहावी फ

टक्का, पट्टू, विकीची- दहावी फ, दहावी फ !
सिद्ध्या, बंड्या, नार्‍याची, हर्‍याची- दहावी फ !
काळ्याची दहावी फ तशी बाळ्याची- दहावी फ !
निळ्याची दहावी फ तशी गोळ्याची- दहावी फ !
दहावी फ, दहावी फ !

भिंतींवरल्या चित्रांनी नटलेली- दहावी फ !
बाकांवरती कोरलेल्या नावांची- दहावी फ !
काचा गेल्या, बोडक्या झाल्या खिडक्यांची- दहावी फ !
गुपचूप लपल्या कोंबड्यामध्ये- दहावी फ !
दहावी फ, दहावी फ !

मनगटातल्या जोराची- दहावी फ, दहावी फ !
कधी सांगा, केंव्हाही सांगा, तयार- दहावी फ !
अडल्या-नडल्या टाकून पडल्या कामांची- दहावी फ !
गाणारी दहावी फ, हाणामारीची- दहावी फ !
दहावी फ, दहावी फ !

झाडे लावा, खड्डे खोदा- दहावी फ, दहावी फ !
पंधरा ऑगस्ट, शाळा सजवा- दहावी फ, दहावी फ !
मांडव घाला, कापड काढा- दहावी फ, दहावी फ !
कवायतीला ढोल बडवा- दहावी फ, दहावी फ !
दहावी फ, दहावी फ !

गीत –

संगीत – श्रीरंग उमराणी

स्वर- स्वर कोणाचा(चे) माहित असल्यास संपर्क करा.

चित्रपट – दहावी फ

गीत प्रकार – चित्रगीत, बालगीत

डोहाळे पुरवा

डोहाळे पुरवा, मैत्रिणींनो झोपाळ्यावर बसवा
डोहाळे पुरवा..

झोपाळा सजवा वेलींनी, गर्भवतीला झुलवा
डोहाळे पुरवा..

भरुनी चुडा हिरवा, शालूही ल्याले भरजरी हिरवा
डोहाळे पुरवा..

वेणीमधे मरवा खोवियला, आणवा चाफा हिरवा
डोहाळे पुरवा..

पहिल्या महिन्याला सुनंस येता थकवा
सासुनी जाणुनी धीर दिला तीज बरवा

तिसर्‍या महिन्याला खण-नारळ अन् वोमी‌
कुणी गर्भवतीची चोर ओटी भरविली

महिन्यात सहाव्या थकलं ग पाऊल
सासर्‍यास लागंल कान्‍ह्याची चाहूल

पहिलीच खेप ही जाणवोनी मुळी देवा
लाजर्‍या वेलीला नकळत बहरही यावा

नववा भरुनिया मुलगीच ग व्हावी
व्हावी ती झाशीची राणी

नववा भरुनिया पुत्र पोटी यावा
भारती जवाहीर व्हावा

गीत –

संगीत – दत्ता डावजेकर

स्वर- आशा भोसले, मालती पांडे

गीत प्रकार – भावगीत

दत्तराज पाहुनी आज तुष्टलो मनी

दत्तराज पाहुनी आज तुष्टलो मनी

औदुंबरी नित्य वसे, भक्तकाम पुरवितसे
कमलनयन श्याम दिसे, धन्य तो जनी

अनसूया ज्याची माय, दृढ धरिले ज्याचे पाय
त्याचे चरित वर्णू काय, सकळ जो जनी

विनायक दास दीन, जळाविना जैसा मीन
ब्रह्मा-विष्णु-महेश तीन आठवी मनी

गीत –

संगीत –

स्वर- आर‌. एन्‌. पराडकर

गीत प्रकार – भक्तीगीत, दिगंबरा दिगंबरा

दत्ता दिगंबरा या हो

दत्ता दिगंबरा या हो
स्वामी मला भेट द्या हो

दत्ता दिगंबरा या हो
सावळ्या मला भेट द्या हो

दत्ता दिगंबरा या हो
दयाळा मला भेट द्या हो

तापलो गड्या त्रिविध तापे
बहुविध आचरलो पापे
मनाच्या संकल्प-विकल्पे
काळीज थरथरथर कापे
कितीतरी घेऊ जन्म फेरे
सावळ्या मला भेट द्या हो

तुम्हाला कामकाज बहुत
वाट पाहू कुठवर पर्यंत
प्राण आला कंठागत
कितीतरी पाहशील बा अंत
दीनाची करुणा येऊ द्या हो
नाथा मला भेट द्या हो

संसाराचा हा वणवा
कितीतरी आम्ही सोसावा
वेड लागले या जीवा
कोठे न मिळे विसावा
आपुल्या गावा तरी न्या हो
दयाळा मला भेट द्या हो

स्वामी मला भेट द्या हो
दयाळा मला भेट द्या हो
सावळ्या मला भेट द्या हो
दत्ता दिगंबरा या हो
स्वामी मला भेट द्या हो

गीत –

संगीत –

स्वर- आर‌. एन्‌. पराडकर

गीत प्रकार – भक्तीगीत, दिगंबरा दिगंबरा

गणपतीबाप्पा मोरया, मंगलमूर्ती

गणपतीबाप्पा मोरया, मंगलमूर्ती मोरया
मोरया रे बाप्पा मोरया रे

जमला हा जयघोष कराया मेळा बाळा-गोपाळांचा
पार्वतीनंदन गजवदनाचा, मंगल बाप्पा मोरयाचा
एक मुखाने एक सुराने घोष चालतो मोरया
गणपती बाप्पा मोरया, मंगलमूर्ती मोरया
मोरया रे बाप्पा मोरया रे

जमले सारे भजनकरी, कुणी घेतला ढोल करी
कुणी होउनी टाळकरी अन्‌ ढोलासंगे ताल धरी
कुणी वाजवी नुसत्या टाळ्या वदे मुखाने मोरया
गणपती बाप्पा मोरया, मंगलमूर्ती मोरया
मोरया रे बाप्पा मोरया रे

घोष संपला प्रसाद आणा, मोदक-पेढे वा बेदाणा
गूळ-खोबरे तीर्थ पळीभर किंवा आणा नुसती साखर
प्रसाद खाऊन आनंदाने म्हणतील बाळे मोरया
गणपती बाप्पा मोरया, मंगलमूर्ती मोरया
मोरया रे बाप्पा मोरया रे

दो दिवसांनी घरास अपुल्या गणपती बाप्पा निघतील जाया
अखेरचा जयघोष कराया, सागरतीरी निरोप द्याया
जमतील बाळे वदतील तेथे खिन्‍न मनाने मोरया
गणपती बाप्पा मोरया, पुढच्या वर्षी लवकर या
मोरया रे बाप्पा मोरया रे

गीत –

संगीत – मधुकर पाठक

स्वर- कृष्णा शिंदे

गीत प्रकार – प्रथम तुला वंदितो, भक्तीगीत