थंड ही हवा, धुंद गारवा
हा पाऊस रिमझिम बरसे !
रेशिमधारा या रुणझुणती
जलथेंबांचे उधळित मोती
पानफुले नाचती, गंधफुले भोवती
झुलती जलांचे आरसे !
काजळकाळ्या या आकाशी
वीज रेखिते सुंदर नक्षी
वारा खुळा होउनी, नाचे कसा अंगणी
गाणे खुषीचे गातसे !
हिरवी शेते हिरवी राने
फुलली भवती हिरवी कवने
नटली बघा ही धरा, झोक तिचा साजिरा
नवरी नवेली ही दिसे !
गीत – वंदना विटणकर
संगीत – डी. एस्. रुबेन
स्वर- पुष्पा पागधरे
गीत प्रकार – भावगीत, ऋतू बरवा
