नको आरती की नको पुष्पमाला
प्रभु भोवताली असे व्यापलेला
खगांच्या मुखाने प्रभु गाई गाणे
फुलांतून उधळी सुगंधी उखाणे
गगनांत फुलवी नवरंग-लीला
सदासर्वकाळी दुज्यांसाठी झिजतो
पुण्यवान जगती खरा तोच जगतो
त्यागात मनुजा उभा स्वर्ग भरला
प्रकाशात फुलतो अंधार काळा
उन्हापाठी पळतो कसा पावसाळा
बुडे प्रेमरंगी कळे खेळ त्याला
गीत – वंदना विटणकर
संगीत – श्रीकांत ठाकरे
स्वर- महंमद रफी
गीत प्रकार – भक्तीगीत
