इथेच आणि या बांधावर अशीच श्यामल वेळ
सख्या रे, किती रंगला खेळ !
शांत धरित्री शांत सरोवर
पवन झुळझुळे शीतल सुंदर
अबोल अस्फुट दोन जिवांचा अवचित जमला मेळ.
रातराणीचा गंध दरवळे
धुंद काहीसे आतुन उसळे
चंद्र हासला, लवली खाली नक्षत्रांची वेल.
पहाटच्या त्या दंवात भिजुनी
विरली हळूहळू सुंदर रजनी
स्वप्नसुमांवर अजुनी तरंगे ती सोन्याची वेळ.
गीत – कवी सुधांशु
संगीत – विठ्ठल शिंदे
स्वर- माणिक वर्मा
गीत प्रकार – शब्दशारदेचे चांदणे, भावगीत
