चल उठ रे मुकुंदा, झाली पहाट झाली
बाहेर चांदण्याला हलकेच जाग आली
मंदावला कधीचा गगनात शुक्रतारा
अन् चोरपावलांनी आला पहाटवारा
गालांवरी उषेच्या आली हळूच लाली
घे आवरून आता स्वप्नांतला पसारा
बेचैन गोकुळाने केला तुझा पुकारा
तव गीत गात सारी ही पाखरे उडाली
तुज दूर हाक मारी कालिंदिचा किनारा
कुंजांतल्या फुलांनी केला तुला इशारा
तुज शोधण्यास वेडी राधा पुन्हा निघाली
गीत – सुरेश भट
संगीत – दशरथ पुजारी
स्वर- सुमन कल्याणपूर
राग – पहाडी
गीत प्रकार – हे श्यामसुंदर, भावगीत
