तरुण आहे रात्र अजुनी राजसा निजलास का रे?
एवढ्यातच त्या कुशीवर तू असा वळलास का रे?
अजूनही विझल्या न गगनी तारकांच्या दीपमाला
अजून मी विझले कुठे रे? हाय ! तू विझलास का रे?
सांग, ह्या कोजागरीच्या चांदण्याला काय सांगू?
उमलते अंगांग माझे.. आणि तू मिटलास का रे?
बघ तुला पुसतोच आहे पश्चिमेचा गार वारा..
रातराणीच्या फुलांचा गंध तू लुटलास का रे?
उसळती हुदयांत माझ्या अमृताच्या धुंद लाटा..
तू किनार्‍यासारखा पण कोरडा उरलास का रे?
गीत – सुरेश भट
संगीत – पं. हृदयनाथ मंगेशकर
स्वर- आशा भोसले
राग – बागेश्री
गीत प्रकार – शब्दशारदेचे चांदणे, भावगीत
