खळेना घडिभरही बरसात
दिवस संपला, नागिणकाळी उतरे सळसळ रात
नक्षत्रांसह दिशा लोपल्या
वाटा अंधाराने गिळिल्या
असेल कोठे सखा? पाऊले वाजति परि थेंबात
गडगडणे थांबवा घनांनो,
कडकडणे आवरा विजांनो,
बायांनो, का तुम्हाहि न कळे स्त्री हृदयाची मात
असेल आला पैलतटावर
येऊ द्या ग त्याला इथवर
संथ वहा ग सरिते तूही, येतो माझा नाथ
गीत – वा. रा. कांत
संगीत – बाळ बर्वे
स्वर- पुष्पा पागधरे
गीत प्रकार – भावगीत
