मुकेपणाने करिसी सेवा, तूच एकला मला विसावा
दुवा काय मी तुजला द्यावा, यशवंत हो जयवंत हो !
दुबळ्यापोटी जन्मलास तू, नकोस दुबळा ठरू परंतु
पुरेच कर तू माझे हेतू, यशवंत हो जयवंत हो !
बालपणी तुज छळिते विपदा, थोरपणी तू मिळव संपदा
धनवंताना जिंक दहादा, यशवंत हो जयवंत हो !
व्यर्थ जन्म रे विद्येवाचुन, ज्ञान जगातील घेई वेचून
कीर्ती आण तू पायी खेचून, यशवंत हो जयवंत हो !
तू अंधाच्या हाती काठी, तू कुलदीपक आईपोटी
तूच एक मज पुढती-पाठी, यशवंत हो जयवंत हो !
गीत – ग. दि. माडगूळकर
संगीत – सुधीर फडके
स्वर- सुधीर फडके
चित्रपट – भिंतीला कान असतात
गीत प्रकार – चित्रगीत
