सुवर्णद्वारावतिचा राणा
श्रीहरी विदुराघरी पाहुणा !
मिष्टान्ने कोठुन?
आणिला कणीकोंडा रांधुन
सांगे आवर्जुन
भाबडी विदुराची सुगरण
वानी रुचकरपणा !
कवळ मुखी नेतसे
मागुनी पुन्हा पुन्हा घेतसे
तृप्त मनी होतसे
तृप्तीची ढेकर वर देतसे
विसरे जलपाना !
प्रेमळपण आगळे
चाटितो उरलीसुरली दळे
योग्यांना ना मिळे
मूर्त ते परब्रह्म सावळे !
काय लाडकेपणा !
गीत – ग. दि. माडगूळकर
संगीत – पु. ल. देशपांडे
स्वर- माणिक वर्मा
चित्रपट – गुळाचा गणपति
गीत प्रकार – हे श्यामसुंदर, चित्रगीत
