वळती वाट, चढता घाट
तोल सावरा अंगाचा
वसंत आला वनात बाई उत्सव चाले रंगांचा !
बाई जपून जा गडे जपून जा
जपून जा बाई जपून जा !
हा चैत्र प्रीतिचा महिना
तरुतरूंत गाती मैना
खगाखगांचा सूर लागतो आज वेगळ्या ढंगाचा !
वनलतांत घुमती वाळे
त्या तिथेच मन्मथ खेळे
तळ्यात फुलल्या कमळांभवती संघ गुणगुणे भृंगांचा !
भिरभिरून वारा येतो
अन् पदरा उडवून देतो
वातावरणी थवा तरंगे सप्तरंगी त्या मेघांचा !
गीत – ग. दि. माडगूळकर
संगीत – सुधीर फडके
स्वर- आशा भोसले
चित्रपट – उमज पडेल तर
गीत प्रकार – चित्रगीत
