झुळूक आणखी एक- आणखी एक पान गळलें !
पानीं फुलला सुमनिं बहरला
माझ्या अंगणिं जरि तरू वठला
शुष्क डहाळिंत अंग मोडिती कोंब नवे इवले !
– आणखी एक पान गळलें !
चंद्रकोर अंगांगीं भरली
दिनदिन कणकण उजळुन खिरली
परि अवसेच्या प्रभात-ओटिंत सूर्यबिंब भरले !
– आणखी एक पान गळलें !
खुशाल गळतां, गळा दळांनो
हसत सरा माझिया क्षणांनो
बघे क्षणांच्या पानडिंत मी अक्षयपण उमले !
– आणखी एक पान गळलें !
गीत – वा. रा. कांत
संगीत – श्रीधर फडके
स्वर- श्रीधर फडके
गीत प्रकार – कविता
