लुटुलुटु धावत खुदुखुदु हासत
हरी आला ग माझ्या अंगणी
रुणझुणतो वाळा करी लाडिकचाळा
नाचे कान्हा ग माझ्या अंगणी
जाई-जुई फुलली
जिवाची कळी कळी फुलली
बघ चिमण्या अधरी
कशी ग बाई धरी चिमणी मुरली
ल्याला गोजिरवाणी, नवलाईची लेणी
नंदकिशोर आला अंगणी
बाल मुकुंद गुणी
जणू सखे साजणी, ब्रह्म सानुले उभे अंगणी
गीत – स. अ. शुक्ल
संगीत – यशवंत देव
स्वर- सुमन कल्याणपूर
गीत प्रकार – हे श्यामसुंदर, भावगीत
