मज नकोत अश्रू घाम हवा
हा नव्या युगाचा मंत्र नवा !
होते तैसी अजून उते मी
सधन अन्नदा सुवर्णभूमी
खंडतुल्य या माझ्या धामी
का बुभुक्षितांचा रडे थवा?
अपार लक्ष्मी माझ्या पोटी
का फिरसी मग माझ्या पाठी
एक मूठभर अन्नासाठी
जगतोस तरी का भ्याड जीवा?
काय लाविसी हात कपाळी
फेकून दे ती दुबळी झोळी
जाळ आळसाची तव होळी
तू जिंक बळाने पराभवा !
मोल श्रमाचे तुला कळू दे
हात मळू दे, घाम गळू दे
सुखासिनता पूर्ण जळू दे
दैन्यास तुझ्या हा एक दवा !
गीत – ग. दि. माडगूळकर
संगीत – स्नेहल भाटकर
स्वर- सुमन कल्याणपूर
चित्रपट – अन्नपूर्णा
राग – मालकंस
गीत प्रकार – स्फूर्ती गीत, चित्रगीत
