झाली पहांट, झाली पहांट
विरे काळोखाचा वेढा
चांद वळला वांकडा
वाजे राउळीं चौघडा, डुले दारीचा केवडा
भवती जंगल दाट
साद घालितो कोंबडा
‘उठा नयन उघडा’
पहा उजळल्या कडा, पडे प्राजक्ताचा सडा
खचली पाऊलवाट
घरघर घरोघरीं
सूर मंजुळ लहरी
तरंगत वार्यावरी जाती पहिल्या प्रहरी
गाती सृष्टीचे भाट
जातां गुंजती गौळणी
मंद पैंजणपावलीं
कटि कुंभ आंदोलती, गानीं गुंग भृंगावली
बोले पाणियाचा घाट
झोपडींत मायलेकीं
दळताती सासूसूना
तुझे पाऊल पडूं दे अंगणांत नारायणा
उजळित पुढली वाट
गीत – राजा बढे
संगीत – पु. ल. देशपांडे, केशवराव भोळे
स्वर- ज्योत्स्ना भोळे
गीत प्रकार – भावगीत
